म्यादी प्रहरीको स–सम्मान विदाई

सर्लाही, २८ फागुन । प्रतिनिधि सभा सदस्य निर्वाचनका लागि खटाइएका म्यादी प्रहरीको विदाइ कार्यक्रम सर्लाहीमा आज सम्पन्न गरिएको छ । जिल्लामा कुल ३ हजार ९२६ जना म्यादी प्रहरी छनोट गरिएकोमा ९ जना अनुपस्थित भएपछि ३ हजार ९१७ जनालाई औपचारिक रूपमा विदाइ गरिएको सर्लाही प्रहरीका सूचना अधिकारी एवं डिएसपी सरोज राईले जानकारी दिए ।

निर्वाचन अवधिभर राज्यले दिएको जिम्मेवारी इमानदारी र कुशलतापूर्वक निर्वाह गरेको भन्दै धन्यवाद दिँदै विदाइ गरिएको हो । सो अवसरमा सर्लाहीका प्रहरी उपरीक्षक योगेन्द्र खडकाले म्यादी प्रहरीले निर्वाचनलाई शान्तिपूर्ण र व्यवस्थित बनाउन महत्वपूर्ण भूमिका खेलेको उल्लेख गर्दै प्रशंसापत्र प्रदान गरेका थिए । कार्यक्रममा एसपी खडकाले म्यादी प्रहरीको योगदानको प्रशंसा गर्दै भविष्यमा पनि राष्ट्र र समाजका लागि सकारात्मक भूमिका निर्वाह गर्न आग्रह गरे ।

जिल्ला प्रहरी कार्यालयसहित जिल्लाका बिभिन्न प्रहरी कार्यालयमार्फत म्यादी प्रहरीलाई विदाई गरिएको हो ।