२०८३ कार्तिक ३०, सोमबार ११:४४

ट्रेन्ड्स :-

Search

ट्रेन्ड्स :-

Search
२०८३ कार्तिक ३०, सोमबार ११:४४

 सर्लाही । छठ पर्वको मुख्य दिन आज साँझ अस्ताउँदो सूर्यलाई पूजा आराधना गरी अर्घ्य दिइँदैछ । 

कात्तिक शुक्ल चतुर्थीदेखि सप्तमीसम्म सूर्यदेवको आराधना, उपासना र पूजा गरी मनाइने यो पर्व अस्ति शुक्रबारदेखि शुरु भएको हो । छठ पर्वको पहिलो दिन स्नान गरी एक छाक खाएर बस्ने गरिन्छ । 

दोस्रो दिन सखर हालेर बनाइएको खीर खरना षष्ठी मातालाई चढाई बर्तालुले प्रसादस्वरुप खाने र नुन नखाई एक छाक फलाहार गरिन्छ । यो पर्वको मुख्य दिन आज निराहार व्रत गरी बेलुकी अस्ताउँदो सूर्यलाई पूजा आराधना गरी अर्घ्य दिने गरिन्छ ।

षष्ठी अर्थात आजको दिन रातभर जागा बसी भोलि कात्तिक शुक्ल सप्तमीको बिहान उदाउँदो सूर्यलाई पूजा आराधना गरी विधिपूर्वक अघ्र्य दिएपछि यो पर्व समापन हुन्छ । केही वर्षअघिसम्म तराईको सीमित क्षेत्रमा मनाइने छठले अहिले राष्ट्रिय स्वरुप ग्रहण गरेको छ ।

विसं २०४६ देखि सरकारले छठ पर्वका अवसरमा देशभर सार्वजनिक बिदा दिने गरेको छ । विगतका केही वर्ष यो बिदा काटिएकामा फेरि बिदा हुन थालेको छ । यसवर्ष सरकारले भोलि पनि सार्वजनिक बिदा दिएको छ ।

छठ पर्वका अवसरमा तराई, मधेशसँगै काठमाण्डौ उपत्यका र अरु ठाउँका नदी, पोखरी तथा जलाशय झकिझकाउ बनाइएको छ । 

सर्लाही । मधेसको प्राचीन मिथिला क्षेत्रमा अहिले छठ पर्वको उल्लास छ । चार दिने यो पर्वको दोस्रो दिन बर्तालु आज ‘खरना’ विधिको तयारीमा छन् । यसअघि पर्वको पहिलो दिन कात्तिक शुक्ल चौथीका दिन हिजो शुक्रबार बर्तालुले ‘नहाय–खाय’ विधिका बीच व्रत सङ्कल्प गरिसकेका छन् ।

पर्वको दोस्रो दिनअर्थात् पञ्चमी तिथिका दिन बिहान पवित्र स्नान गरी दिनभरि निराहार उपवास (व्रत) बसेर राती सख्खरमा पकाइएको खीर कूल देवता र छठी देवीलाई चढाइ बर्तालुले त्यही खीर खाने विधि पूरा गरिने छ । यो विधिलाई मैथिलीमा ‘खरना’ भनिन्छ ।

छठलाई मिथिलामा लोकआस्थाको महापर्व भनिन्छ । श्रद्धा, निष्ठा, समर्पणभाव र आत्मशुद्धि पर्वका मुख्यपक्ष मानिन्छन् । यिनै निष्ठामा रहेर ‘खरना’का दिन दिनभरि उपवास बसेर बेलुका चन्द्र दर्शन गरिसकेपछि माटोको नयाँ चुलो र माटाकै भाडामा सख्खर, दूध र मङ्सिरमा पाक्ने स्थानीय जातको धानको चामल मिलाइ पकाइएको खीर केराको पातमा राखेर छठी मातालाई चढाएर बर्तालु र परिवारका अन्य सदस्यले प्रसादको रुपमा खाने गर्छन् । आज दिनभरि उपवास गर्ने बर्तालुले सूर्यास्तपछि चन्द्रदर्शन गरेर यो विधि सम्पन्न गर्नेछन् ।

पर्वको तेस्रो दिन भोलि बिहीबारअर्थात् कात्तिक शुक्ल षष्ठी तिथिमा सूर्य उपासनाको निराहार व्रत बसेर साँझपख बर्तालुले जलाशयमा बनेको मनोरम घाटमा पुगेर कम्मरसम्म डुब्ने पानीमा चोबलिएर अस्ताउँदा सूर्यलाई पहिलो अघ्र्य दिनेछन् । यसलाई मिथिलामा ‘सझुका अरख’ वा ‘सझियाघाट’ भन्ने गरिएको छ ।

त्यसैगरी, सप्तमीका दिन बिहान उदाउँदा सूर्यलाई दोस्रो अघ्र्य दिएर पर्व समापन गर्ने मैथिल चलन छ । उदाउँदा सूर्यलाई दिइने अघ्र्यलाई मिथिलामा ‘भोरका अरख’ वा ‘पारन’ भनिन्छ । अघ्र्य दिइँदा पहिले जटासहितको नरिवल र त्यसपछि क्रमशः पर्वका लागि पकाइएका मिष्टान्न परिकार र केरासहितका फलफूल सूर्यदेवलाई देखाउने चलन छ ।

छठ पर्वमा बनाइएका प्रसाद ठकुवा, भुसुवासहितका मिष्टान्न परिकार इष्टजनलाई घरमै बोलाएर ख्वाउने र आफन्त नातेदारकहाँ पुर्याउने गरिन्छ । अघ्र्य दिने पूजा सामग्रीमा ठकुवा, भुसुवासहितका मिष्टान्न परिकार रहन्छन् । यी परिकार ढिकी–जाँतोमा कुटिएको, पिसिएको पिठोबाटै तयार गरिन्छ । पर्वमा अघ्र्य दिने पवित्र जलाशय किनारमा चित्र्ताकर्षक घाट बनाइन्छ ।

केही वर्ष पहिलेसम्म मधेसी हिन्दूले मात्र मनाउँदै आएका यो पर्व अब पर्वते हिन्दू पनि बाक्लै मनाउन थालेका छन् । मिथिलामा इस्लाम धर्मावलम्बीले समेत बर्तालुलाई अघ्र्यका बेला आफ्नो भाकल सूर्यदेवलाई देखाइदिन दिने गरेका छन् । यसले छठ पर्वलाई साझा बनाएको छ । पर्वमा सबै धर्र्म, संस्कृति र जाति समुदाय सामेल हुने हुनाले यो पर्व मिथिला लोकसंस्कृतिको अभिन्न अङ्ग बनेको छ । सबैको साझा बन्दै गएको हुनाले यो पर्वलाई लोकआस्थाको महापर्व भनिएको भङ्गाहा–५ सीतापुरस्थित माध्यमिक विद्यालयका प्रधानाध्यापक मनोहरप्रसाद यादव बताउछन् । रातोपाटी

सर्लाही । हरेक वर्ष कात्तिक कृष्ण त्रयोदशीका दिन मनाइने धन्वन्तरी जयन्ती एवम् आरोग्यता दिवस आज विभिन्न कार्यक्रम गरी मनाइँदैछ ।

वन जङ्गलमा पाइने जडिबुटीमा आधारित प्राचीनतम् वैदिक चिकित्सापद्धति आयुर्वेदका प्रवर्तक धन्वन्तरीको उत्पत्ति भएको सम्झनामा धन्वन्तरी जयन्ती एवम् आरोग्यता दिवस मनाउने गरिन्छ । आजको दिनलाई आयुर्वेदका चिकित्सकले सत्सङ्कल्प गरी शुभकार्य प्रारम्भ गर्ने अवसरका रूपमा लिने गर्छन् ।

काठमाण्डौको नरदेवीमा आयुर्वेद क्याम्पसको स्थापना भएपछि नेपालमा विधिवत् धन्वन्तरी जयन्ती मनाउन थालिएको हो । त्यसबेला राजकीय आयुर्वेद महाविद्यालयका नाममा स्थापना भएको आयुर्वेद क्याम्पस आयुर्वेद अस्पतालको शिक्षण अस्पतालका रूपमा सञ्चालनमा थियो ।

२०२९ सालदेखि भने त्रिभुवन विश्वविद्यालय चिकित्सा शास्त्र अध्ययन संस्थान अन्तर्गत आङ्गिक क्याम्पसका रूपमा सञ्चालनमा रहेको छ । आयुर्वेद क्याम्पस अहिले कीर्तिपुरमा सरेको छ । आज धनवन्तरीको पूजा, आराधना गर्ने कार्यक्रम तय भएको आयुर्वेद तथा वैकल्पिक चिकित्सा विभागका महानिर्देशक श्यामबाबु यादवले जानकारी दिनुभयो ।

आयुर्वेद क्षेत्रका व्यक्तिको पहलमा २०५६ सालदेखि धन्वन्तरी जयन्तीको दिनलाई आरोग्यता दिवसका रूपमा मनाउन थालिएको हो । धन्वन्तरी जयन्तीका अवसरमा आज सिंहदरबार वैद्यखाना विकास समिति, आयुर्वेद अस्पताल नरदेवी, आयुर्वेद क्याम्पस कीर्तिपुर, नेपाल संस्कृत विश्वविद्यालयको आयुर्वेद क्याम्पस दाङ, जडिबुटी उत्पादन तथा प्रशोधन कम्पनी लिमिटेड कोटेश्वर र निजी क्षेत्रबाट खुलेका आयुर्वेद अस्पतालमा विविध कार्यक्रम गरिन्छ ।

विगतको तुलनामा पछिल्लो समय आयुर्वेदिक औषधिको माग चार गुणासम्म बढेको सिंहदरबार वैद्यखाना विकास समितिले जनाएको छ । समितिले उत्पादन गरेका आयुर्वेद औषधीको माग अत्यधिक हुने गरेको छ । 

सर्लाही । कात्तिक कृष्ण त्रयोदशीका दिन आज यमराजको दूतका रूपमा कागलाई खानेकुरा खान दिएर काग तिहार मनाइँदैछ । यमराजले लोकको खबर कागका माध्यमबाट थाहा पाउने भएकाले कागलाई यमदूतका रूपमा मान्ने शास्त्रीय मान्यता छ ।

कागले यमराज समक्ष राम्रो खबर लगिदियोस् भनेर आजका दिन कागलाई पूजा आराधनासहित मीठो खान दिई खुशी पार्ने गरिएको हो । लोक व्यवहारमा काग घरमा आई कराएमा शुभ बोल, शुभ बोल भनी भन्ने चलन छ । काग घर वरपर आई कराएमा उसले केही खबर लिएर आएको विश्वास गरिन्छ ।

यस अवसरमा काठमाण्डौको कागेश्वरी मनोहरा नगरपालिका–१ को कागेश्वरी महादेव मन्दिरमा आज विशेष पूजा आराधना हुने गर्छ । यसैगरी हनुमानढोकाको कागेश्वरी मन्दिरमा पनि कागको विशेष पूजा आराधना गरिन्छ ।

यस वर्ष तिथिको घटबढका कारण सायंकालमा कात्तिक कृष्ण त्रयोदशी परेका दिन शुरु हुने यमपञ्चक हिजो बेलुकीदेखि नै शुरु भएको छ । यमदीप दान हिजोदेखि नै शुरु भएको हो । गरगहना एवम् तामाका भाँडाकुँडा किन्ने धनतेरस पर्व हिजो नै मनाइएको छ ।

भोलि नरक चतुर्दशी, कुकुर तिहार र लक्ष्मीपूजा परेको छ । पर्सि २३ गते गाईपूजा तथा २४ गते गोवर्धन पूजा, गोरुपूजा, बलिपूजा, हलितिहार तथा म्हपूजा मनाइनेछ । २४ गतेदेखि नेपाल संवत् ११४७ पनि शुरु हुनेछ ।

यमपञ्चकको अन्तिम दिन अर्थात् २५ गते बुधबार यमद्वितीया तथा भाइटीका मनाइन्छ । नेपाल पञ्चाङ्ग निर्णायक विकास समितिका अनुसार भाइटीकाका लागि बिहान ११ बजेर ७ मिनेटको साइत उत्तम छ ।

१. याद तिम्रो मन भित्रको लुकाउनु कसरि
मनको पिर मनको व्यथा फुकाउनु कसरि
मन दुख्दा आँखा रुन्छन्, लुकाउछु भन्छु आँशु
म रोए तिमिलाइ दुख्छ मन दुखाउनु कसरि !

२. मैले प्रेम गरिरहँदा तिमिले बेवास्ता गर्यौ भने
‎म नजिक आउदै गर्दा तिमि पर सर्यौ भने,
‎तिमिले बोलाएको मैले नसुन्ने दिन पनि आउला पक्कै
‎जिन्दगिको यात्रामा म अगाडि तिमि पछाडि पर्यौ भने !

३. ‎तिम्रो मेरो दु:खको पाटो अलग भो
‎तिमि परदेश, घरदेशमा म माटो अलग भो
‎
परदेशमा तिम्रो दु:ख होलान मैले नदेखेको
‎आँशुले भिज्ने मेरो शिरानिको टाटो अलग भो
‎
‎तिमि खोज्छौ मरुभुमिमा पानि जस्तै सुख
‎बन जंगल मेलापातमा म बाटो अलग भो
‎
‎फर्कि आउनु दु:ख-सुख सँगै हौँला रमाउँला
‎पैसा सँगै जीवनको साटो अलग भो !

✍️आशिका विश्वकर्मा
‎आँधिखोला गाँउपालिका-४, ‎स्याङ्गजा ।

लालबन्दी । राष्ट्रिय स्वतन्त्र पार्टी रास्वपाको वडा कमिटिले निशुल्क आँखा जाँच शिबिर सम्पन्न गरेको छ । सर्लाहीको लालबन्दी १५ स्थित वडा कमिटिले शिबिरको आयोजना गरेको हो ।

शिबिर अन्तर्गत आज कटहरबोट गाउँका स्थानीयको आँखा जाँच गरिएको शिबिरस्थलबाट बिक्रम खड्काले जानकारी दिए । स्थानीय बिपन्न नागरिकको आँखा जाँच गर्ने उद्धेश्यले आयोजना गरिएको शिबिरमा ४१ जनाले आँखा जाँच गराएका खड्काले बताए ।

शिबिर वडा नम्बर १५ को बिभिन्न स्थानमा आयोजना भएको र बोहोरेडाँडा, सिरकालिन्जोरका स्थानीयको आँखा जाँच सँगै शिबिर सम्पन्न हुने छ ।

रास्वपाका वडा सभापति चन्द्र बहादुर रायका अनुसार ज्योती भिजन फाउण्डेशन वीरगन्जको प्राविधिक सहयोगमा निशुल्क आँखा जाँच शिबिर आयोजना गरिएको हो । यसअघि देउराली, भुमरा र झरझरा गाउँमा शिबिर सम्पन्न भएको छ ।

जिल्लाका बिकट वडामध्येको एक यस वडाका बिभिन्न स्थानमै निशुल्क आँखा जाँच शिबिरको आयोजना गरिएको यो पहिलो पटक हो । आफ्नै ठाउँमा निशुल्क आँखा जाँच्न पाउँदा स्थानीयले खुसि हँदै आयोजक तथा चिकित्सकहरुलाई धन्यवाद दिएका थिए ।

सर्लाही । नेपालीहरूको दोस्रो ठुलो चाड तिहार (दीपावली) तथा छठ पर्वलाई लक्षित गरी चालु आर्थिक वर्ष (२०८३/०८४) को पहिलो तीन महिनामा मात्रै करिब साढे २ अर्ब रुपैयाँ बराबरको भाइ मसला नेपाल भित्रिएको छ । भाइ मसला भाइटीकाका दिन दिदीबहिनीले दाजुभाइलाई टीका लगाइदिएर सगुनका रूपमा दिने प्रचलन छ ।

भन्सार विभागको तथ्याङ्क अनुसार चाडपर्वमा अत्यधिक खपत हुने ओखर, काजु, बदाम, किसमिस र नरिवलको आयातका लागि मात्रै चालु आर्थिक वर्षको तीन महिनामा २ अर्ब ४४ करोड १४ लाख ७८ हजार रुपैयाँ बाहिरिएको हा । त्यसबाट राज्यले ५९ करोड ३३ लाख १५ हजार रुपैयाँ भन्सार राजस्व सङ्कलन गरेको छ ।

चालु आर्थिक वर्षको पहिलो तीन महिनामा आयात भएका पाँच वस्तु (ओखर, बदाम, ओखर, काजु र किसमिस)हरूको विवरण हेर्दा सबैभन्दा धेरै रकम ओखर आयातमा खर्च भएको देखिन्छ । यस अवधिमा ६५ करोड ३९ लाख ९९ हजार रुपैयाँ बराबरको १५ लाख २५ हजार २५० किलोग्राम ओखर आयात भएको छ । जसबाट १५ करोड ८९ लाख ७० हजार रुपैयाँ राजस्व उठेको छ । ओखर मुख्यतया चीनबाट ४७ करोड २ लाख र अमेरिकाबाट १८ करोड ३६ लाख रुपैयाँको आयात गरिएको हो ।

त्यस्तै, भाइ मसला र पूजाआजा दुवैमा अनिवार्य मानिने नरिवल परिमाणका हिसाबले सबैभन्दा धेरै आयात भएको छ । तीन महिनामै १ करोड १४ लाख ६ हजार २०७ किलोग्राम नरिवल ५६ करोड ६० लाख ७० हजार रुपैयाँमा आयात भएको छ भने यसबाट ११ करोड १० लाख ४५ हजार रुपैयाँ राजस्व संकलन भएको छ । नरिवलको आयात पूर्ण रूपमा भारतमा निर्भर छ ।

यसैगरी, बदाम (हाडे र कागजी) तर्फ ५ लाख ९ हजार ७८ किलोग्राम आयात भएको छ । जसको आयात मूल्य ४७ करोड ९३ लाख ३५ हजार रुपैयाँ छ भने यसबाट ११ करोड ६५ लाख ५३ हजार रुपैयाँ राजस्व उठेको छ । बदामको मुख्य आयात संयुक्त राज्य अमेरिकाबाट मात्रै ४७ करोड ४२ लाख रुपैयाँ बराबरको भएको छ ।

भाइ मसलामा लोकप्रिय काजु यस अवधिमा ४६ करोड ५७ लाख २६ हजार रुपैयाँको (४ लाख ६९ हजार ५१६ किलोग्राम) आयात भएको छ । यसबाट राज्यले १३ करोड ९५ लाख ५२ हजार रुपैयाँ राजस्व पाएको छ । काजु मुख्यतया भारतबाट २५ करोड २८ लाख र भियतनामबाट २१ करोड २७ लाख रुपैयाँको भित्रिएको छ ।

त्यस्तै, किसमिसतर्फ ७ लाख ३३ हजार ५९८ किलोग्राम आयात हुँदा २७ करोड ६३ लाख ४९ हजार रुपैयाँ बाहिरिएको छ भने ६ करोड ७१ लाख ९६ हजार रुपैयाँ राजस्व संकलन भएको छ । किसमिसको मुख्य हिस्सा चीनबाट १९ करोड ९१ लाख र भारतबाट ७ करोड ७० लाख रुपैयाँको आयात भएको छ ।

यस्तै ओखर पनि १५ लाख २५ हजार किलो आयात भएको छ । जसको मूल्य ६५ करोड ३९ लाख ९९ हजार रुपैयाँ बराबरको रहेको छ । ओखर आयातबाट १५ करोड ८९ लाख ७० हजार बराबरको राजस्व संकलन भएको तथ्यांक छ ।

सर्लाही । मधेश प्रदेश सरकारका गृह, सञ्चार तथा कानुनमन्त्री फकिरा महतोले बुधबार बिहान रौतहटको बौधिमाई नगरपालिका–५, कोपवामा निर्माणाधीन इलाका प्रहरी कार्यालयको भवनको स्थलगत निरीक्षण तथा अनुगमन गर्नुभएको छ।

निरीक्षणका क्रममा मन्त्री महतोले भवन निर्माणको भौतिक प्रगति, निर्माण कार्यको अवस्था तथा प्रहरी कार्यालय सञ्चालनका लागि आवश्यक पूर्वाधारबारे जानकारी लिनुभएको थियो ।

सोही क्रममा उहाँले आगामी चाडपर्वलाई लक्षित गर्दै सर्लाही र रौतहट जिल्लाको समग्र सुरक्षा अवस्थाबारे समेत जानकारी लिनुभएको छ । दुवै जिल्लामा शान्ति सुव्यवस्था कायम गर्न सुरक्षा निकायले अपनाएका तयारी, सुरक्षा रणनीति तथा सम्भावित चुनौतीका विषयमा उहाँले सम्बन्धित सुरक्षा अधिकारीहरूसँग छलफल गर्नुभएको थियो ।

चाडपर्वको समयमा हुन सक्ने चोरी, लुटपाट, तस्करीलगायत आपराधिक गतिविधि नियन्त्रण गर्दै नागरिकको जीउधनको सुरक्षा सुनिश्चित गर्न सुरक्षा निकायलाई थप सतर्क, सक्रिय र जिम्मेवार भएर काम गर्न मन्त्री महतोले निर्देशन दिनुभएको छ ।

उहाँले सुरक्षा व्यवस्थालाई प्रभावकारी बनाउन आवश्यक पूर्वाधार विकास, सुरक्षा निकायबीच समन्वय तथा नागरिकको सुरक्षालाई प्राथमिकतामा राखेर काम गर्नुपर्नेमा जोड दिनुभएको थियो ।

निर्माणाधीन इलाका प्रहरी कार्यालयको भवन सम्पन्न भएपछि स्थानीय क्षेत्रमा प्रहरी सेवा प्रवाह थप सहज हुनुका साथै शान्ति सुरक्षा कायम गर्न सहयोग पुग्ने अपेक्षा गरिएको छ ।

सर्लाही । रौतहटमा गएराति अज्ञात व्यक्तिले एक युवामाथि गोली प्रहार गरेको छ। गोली लागेका युवकको अवस्था गम्भीर रहेको प्रहरीले जनाएको छ। 

गौर नगरपालिका- ४ गढवा टोलस्थित पानी ट्यांकी नजिक मंगलबार राति सवा ९ बजे बजेतिर स्थानीय २८ वर्षीय राकेश यादवमाथि गोली प्रहार भएको हो। 

उनलाई पेस्तोलको गोलीका छर्रा लाग्दा दाहिने खुट्टा तथा शरीरका विभिन्न भागमा चोट लागेको प्रहरीले जनाएको छ। 

यादवलाई प्रादेशिक अस्पताल गौरमा सामान्य उपचारपछि थप उपचारका लागि राति नै वीरगन्ज लगिएको छ। उनको नेपाल मेडिसिटी बयोधा अस्पतालमा उपचार जारी छ। उनको अवस्था गम्भीर रहेको प्रहरीले जनाएको छ।

घाइते यादवको ढाडमा तीन, दाहिने पाखुरामा एक र दुवै खुट्टामा दुई गरी ६ वटा गोलीका छर्रा लागेको छ। 

घटनास्थलमा ७.६२ एमएम पेस्तोलको तीन वटा खाली खोका फेला परेको प्रहरीले जनाएको छ।

घटनाबारे जिल्ला प्रहरी कार्यालय रौतहटले अनुसन्धान सुरु गरेको छ। 

रानिगञ्ज । सर्लाहीको लालबन्दी नगरपालिका वडा नम्बर १७ रानिगञ्जमा आजबाट कृषि बजार संचालनमा आएको छ । पूर्व–पश्चिम लोकमार्गअन्तर्गत लालबन्दी बजारको सवारी चाप कम गर्ने र कृषकलाई सहज बजार उपलब्ध गराउने उद्देश्यसहित ‘देवता महाकाली कृषि बजार’ सञ्चालनमा आएको हाे ।

देवता महाकाली कृषि बजार ब्यवस्थापन समितीका अध्यक्ष रामबहादुर खड्काको अध्यक्षता तथा मधेश प्रदेशका भूमि व्यवस्था, कृषि तथा सहकारी मन्त्री श्यामप्रसाद पटेलको प्रमुख आतिथ्यमा बजारको उद्घाटन गरिएको हो ।

लामो समयको प्रयासपछि वडा कार्यालय, लालबन्दी नगरपालिका, मधेश प्रदेश सरकार र सङ्घीय सरकारको संयुक्त लगानीमा करिब १ करोड ९ लाख रुपैयाँको लागतमा बजारको आवश्यक भौतिक संरचना निर्माण गरिएको हो । स्थानीय देवता महाकाली गुठीले उपलब्ध गराएको चार बिघा जग्गामा १२ वटा सटर तथा ३६ वटा स्टलसहितको व्यवस्थित कृषि सेड तयार पारिएको छ ।

सञ्चालक समितिका अनुसार लामो समयदेखिको तयारीपछि आगामी कात्तिक १५ गतेदेखि बजार नियमित रूपमा सञ्चालन गर्ने निर्णय गरिएको छ । आइतबार लाग्ने हाटबजारमा तरकारीका साथै खसीबोकासमेत किनबेच हुने गरी व्यवस्था मिलाइएको छ ।

यो कृषि बजारलाई लालबन्दीको मुख्य तरकारी बजारको विकल्पका रूपमा हेरिएको छ । हाल लालबन्दी नगरपालिका–७, डुमडुमे मन्दिरअगाडि १८ कट्ठा क्षेत्रफलमा मात्र तरकारी बजार सीमित हुँदा ठाउँ साँघुरो भएर प्रत्येक दिन बिहान २ देखि ३ घण्टासम्म पूर्व–पश्चिम राजमार्गमा सवारी आवागमन प्रभावित हुँदै आएको छ ।

कार्यक्रममा बोल्दै लालबन्दी नगरपालिकाका प्रमुख वासुदेव अधिकारीले महेन्द्र राजमार्ग विस्तारपछि लालबन्दीको मुख्य बजार थप साँघुरिने अवस्था रहेकाले रानीगन्ज र नवलपुरमा तरकारी बजार विस्तार गर्नुको विकल्प नरहेको स्पष्ट पारे । उनले लालबन्दीको अस्तव्यस्तता अन्त्य गर्न यी बजारहरूलाई व्यवस्थित गरिने बताए ।

त्यसैगरी, लालबन्दी थोक तरकारी बजारका अध्यक्ष प्रमोद थपलियाले रानीगन्ज तरकारी बजारलाई तरकारी उपसङ्कलन केन्द्रका रूपमा विकास गर्न आफूहरूले आवश्यक समन्वय र सहकार्य गर्ने प्रतिबद्धता जनाए ।

कार्यक्रमलाई सम्बोधन गर्दै मन्त्री पटेलले बजारलाई निरन्तरता दिन सकेको सहयोग गर्ने र किसान प्रोत्साहनका कार्यक्रमलाई थप ब्यवस्थित बनाउन भुमिका खेल्ने बताएका थिए ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।