लालबन्दी, २५ चैत । सर्लाहीको ईश्वरपुर नगरपालिका–१२ घारीबथानमा करेन्ट लागेर एक ५ वर्षीय बालकको निधन भएको छ । शुक्रबार बिहान करिब पौने ११ बजेको समयमा खेतमा पानी सिँचाइका लागि चलाइएको मोटर नजिकै खेल्ने क्रममा उनलाई करेन्ट लागेको प्रहरीले जनाएको छ ।
मृत्यु हुनेमा घारीबथानकै राम बैलकोटीका छोरा ५ वर्षीय वियान्श बैलकोटी रहेका छन् । स्थानीय रामचन्द्र खड्काले कुलोबाट मोटर जोडी आफ्नै खेतमा पानी सिँचाइ गरिरहेको स्थान नजिक वियान्श खेलिरहेको अवस्थामा अचानक करेन्ट लागेर घाइते भएका थिए ।
करेन्ट लागेर घाइते भएका बालकलाई तत्काल उपचारका लागि ईश्वरपुर नगर अस्पताल बयलबास पठाइएको थियो । अस्पतालमा स्वास्थ्यकर्मीले चेकजाँच गर्दा दिउँसो १२ बजे डाक्टरले उनलाई मृत घोषणा गरेको इलाका प्रहरी कार्यालय, केशरगञ्जले जानकारी दिएको छ । बालकको शव हाल सोही अस्पतालमा रहेको छ ।
घटनाको खबर प्राप्त हुनासाथ अस्थायी प्रहरी पोष्ट घारीबथानबाट प्रहरी सहायक निरीक्षक प्रहरी टोली खटिगएको थियो । पछि इलाका प्रहरी कार्यालय केशरगञ्जबाट प्रहरी निरीक्षक नितेश कुमार सिंहको कमाण्डमा मुचुल्का सहितको प्रहरी टोली घटनास्थलमा पुगेको थियो ।
घटनास्थल अस्थायी प्रहरी पोष्ट घारीबथानबाट करिब डेढ किलोमिटर उत्तरतर्फ पर्छ । प्रहरीले घटनाबारे थप अनुसन्धान गरिरहेको जनाएको छ।
मलंगवा, २० चैत । एसइईको परीक्षा केन्द्रभित्रै मोबाइल फोन लगेर चिट चोरी गर्ने तीन जना परीक्षार्थी पक्राउ परेका छन् ।
दक्षिणी भेग गोडैता नगरपालिका–५, रामवनमा रहेको जनता माध्यमिक विद्यालय परीक्षा केन्द्रमा मोबाइल फोनबाट चिट चोरी गर्दा गर्दै तीन जना विद्यार्थी पक्राउ परेका हुन् । पक्राउ पर्नेमा जनता नमूना माध्यमिक विद्यालय बलरा नगरपालिका–८, गडहीया डुमरियाका दुई जना छात्र र नारायणहरि माध्यमिक विद्यालय गोडैता नगरपालिका–१०, सिसौटियाका एक जना छात्र रहेका छन् । पक्राउ पर्ने विद्यार्थीको नाम गोप्य राखिएको छ ।
उनीहरुले मोबाइलबाट फोटो खिचेर सेन्टर बाहिर बसेका मानिसहरुलाई प्रश्नपत्र पठाउन ह्वाट्सएप ग्रुप नै बनाएको पाइएको छ । परीक्षा केन्द्रमा जडान गरिएको सिसिटिभीबाट निगरानी गर्दा शंकास्पद गतिविधि गरेको पाइएपछि खानतलासी लिँदा तीन जना विद्यार्थीको साथबाट मोबाइल फोन बरामद भएको शिक्षा विकास तथा समन्वय इकाइ सर्लाहीका सूचना अधिकारी सुनिलकुमार कुशवाहाले बताए ।
पक्राउ परेका तीनै जना परीक्षार्थीलाई इलाका प्रहरी कार्यालय बरहथवाको नियन्त्रणमा राखिएको छ । परीक्षाको मर्यादाविपरीत कार्यमा संलग्न तीनै जना परीक्षार्थीको आज दोस्रो दिन भएको अनिवार्य नेपाली विषयको परीक्षा रद्ध गरिएको शिक्षा विकास इकाइका सूचना अधिकारी कुशवाहाले जानकारी दिए ।
एसइई अन्तर्गत हिजो पहिलो दिन अनिवार्य अङ्ग्रेजी विषयको परीक्षामा कविलासी नगरपालिका–२, पिपरियास्थित बालगोविन्द जनता माध्यमिक विद्यालयबाहिर बसिरहेका एक जना व्यक्तिको मोबाइलमा परीक्षा जारी रहँदा प्रश्नपत्र फेला परेपछि उनी पक्राउ परेका थिए ।
मलंगवा, २० चैत । सर्लाहीका प्रमुख जिल्ला अधिकारी (सिडिओ) रामुराज कडरियाले कार्यालयमा आउने सेवाग्राहीको काम सम्पन्न गरेर मात्र घर फर्काउन कर्मचारीलाई निदेर्शन दिएका छन् ।
कार्यालयका प्रमुख एवं प्रमुख जिल्ला अधिकारी कडरियाले सम्पूर्ण कागजातसहित सेवा लिन आउने सेवाग्राहीलाई कार्यालय समयभन्दा बढी समय बसेर भए पनि काम सकाएर मात्र घर पठाउन कर्मचारीहरुलाई कडा निर्देशन दिएका हुन् ।
शुक्रबार मात्र कडरियाको अध्यक्षतामा बसेको जिल्ला प्रशासन कार्यालयका कर्मचारीहरुको बैठकले सेवाग्राही सेवा लिन आएकै दिन काम फर्छ्याैट गरेर पठाउने निर्णय गरेको छ । कागजात नपुगेका सेवाग्राहीलाई कुन-कुन कागजात अपुग छन् सोबारे प्रष्ट बताएर पठाउने निर्णय गरेको छ ।
सर्लाहीमा गएको बुधबार बसेको कार्यालय प्रमुखहरुको बैठकले समेत चैत १३ गते मन्त्रीपरिषद्को बैठकबाट स्वीकृत शासकीय सुधार सम्वन्धी कार्यसूचीहरु अन्तर्गत आ-आफ्नो कार्यालयसँग सम्वन्धित बुँदाहरु अक्षरशः पालना गरी कार्यान्वयन गर्ने निर्णय गरेको थियो ।
लालबन्दी, २० चैत । सर्लाहीको लालबन्दीस्थित लालबन्दी भेट्रानलाई १६ थान जर्सि सहयोग प्राप्त भएको छ । लालबन्दी भेट्रान फुटबल क्लवका अध्यक्ष कृष्ण बछार थारुले दिएको जानकारी अनुसार लालबन्दीको पहिचानको रुपमा चिनिने हेल्लाे वर्गर हाउस लालबन्दीले जर्सि सहयोग गरेको हो ।
आज वर्गर हाउसमै एक कार्यक्रमका बिच वर्गर हाउसका संचालक अर्जुन तामाङले भेट्रान अध्यक्ष थारुसहितका खेलाडीको टोलीलाई जर्सि हस्तान्तरण गरेका हुन । जर्सि प्राप्त गरेपछि भेट्रान अध्यक्ष थारुले सहयोगी मनका धनि वर्गर हाउस संचालक तामाङलाई धन्यवाद व्यक्त गरे । उनले यसरी सहयोग प्राप्त गर्दा आफुलाई खुसि लागेको र अन्य ब्यक्ति तथा संघ संस्थाले पनि सहयोग गर्न चाहेमा आफुसँग सम्पर्क गर्न सक्ने प्रतिकृया दिए ।
लालबन्दी भेट्रानले पछिल्लो समय चर्चा बटुलि रहेको छ । निरन्तरको टे«निङ, अन्य ठाउँका भेट्रानहरुसँग भईरहने प्रतिस्पर्धा (म्याच) कारण लालबन्दी भेट्रान सर्वत्र परिचित हुँदै गएको भेट्रानका खेलाडीहरु बताउँछन । ३५ वर्ष माथिका खेलाडीहरु हरेक दिन बिहान लालबन्दी ८ स्थित खेल मैदानमा ट्रेनिङका लागी पुग्ने गर्दछन ।
निरन्तरको खेल अभ्यासले खेल कौशलतासँगै स्वास्थ्यलाई पनि फाईदा पुग्ने रानिगञ्जबाट हरेक दिन मैदान पुग्ने बिभुसिंह थापाको भनाई छ ।
हरिवन, १८ चैत । सर्लाहीको हरिवन नगरपालिकामा संचालन भएको चार दिने निःशुल्क आँखा शिबिरमा छ सय बढिले लाभ लिएका छन । हरिवन नगरपालिका तथा नेपाल नेत्र ज्योति संघ अन्तर्गत सञ्चालित आँखा उपचार केन्द्र सुखेपोखरीको सहकार्यमा सञ्चालन गरिएको निःशुल्क आँखा जाँच शिविरमा ६०५ जनाले आँखा जाँच गराएका हरिवन नगरपालिकाको स्वास्थ्य शाखा प्रमुख रामबाबु चौधरीले जानकारी दिए ।
गएको १५ गतेदेखि आजसम्म हरिवन नगरपालिकाका विभिन्न स्वास्थ्य संस्थाहरूमा सञ्चालन गरिएको शिविरमा ३६१ महिला र २४४ जना पुरुषले आफ्नो आँखा जाँच गराएका थिए । जसमध्ये १३६ जनामा मोतियाविन्दुको समस्या फेला परेको छ । मोतियाबिन्दुको समस्या फेला परेका बिरामिलाई यहि महिनाको २० र २१ गते सुकेपोखरी आँखा अस्पतालमा निशुल्क शल्यक्रिया गरिने हरिवन स्वास्थ्य शाखा प्रमुख चौधरीले बताए ।
मोतियाबिन्दुका बिरामिलाई गौर आँखा अस्पतालको प्राविधिक सहयोगमा आँखा उपचार केन्द्र सुखेपोखरीमा निःशुल्क शल्यक्रिया गर्न लागिएको हो । शिबिरमा मोतियाविन्दु पहिचान भएका बिरामीहरूलाई थप परीक्षणका लागि सुखेपोखरीस्थित आँखा उपचार केन्द्रसम्म लैजान हरिवन नगरपालिकाले निःशुल्क एम्बुलेन्स सेवा उपलब्ध गराएको थियो ।
शिविरको क्रममा स्वास्थ्य शाखा प्रमुख रामबाबु चौधरीले स्थलगत अनुगमन तथा सुपरिवेक्षण गरेका थिए । कार्यक्रम सफल बनाउन आँखा उपचार केन्द्र सुखेपोखरी र हरिवन स्वास्थ्य चौकीको टोलीले महत्वपूर्ण भूमिका खेलेको हरिवन नगरपालिकाले जनाएको छ । शिविर हरिवन–४ स्थित सासापुर नगर अस्पताल, हरिवन–६ को घुर्कौली स्वास्थ्य चौकी, हरिवन–२ को अत्रौली स्वास्थ्य चौकी तथा हरिवन–८ को स्वास्थ्य चौकीमा सञ्चालन गरिएको थियो ।
चार दिनको निःशुल्क शिबिर अवधिमा कुल १२० जनालाई निःशुल्क चश्मा समेत वितरण गरिएको थियो ।
सर्लाही, १८ चैत । सर्लाहीस्थित सागरनाथ वन विकास परियोजनाको कर्मचारी संगठनको प्रारम्भिक कार्य समिति भंग गरिएको छ ।
नेपाल सरकारको मन्त्रिपरिषद्ले शासकीय सुधारअन्तर्गत राजनीतिक ट्रेड युनियनहरू भंग गर्ने निर्णय गरेपछि समितिको बैठकले उक्त निर्णयको स्वागत गर्दै चैत्र १६ गतेदेखि लागु हुने गरी समिति भंग गरेको जनाएको हो ।
परियोजनाले जारी गरेको सूचनाअनुसार मन्त्रिपरिषद्को चैत्र १३ गतेको बैठकले स्वीकृत गरेको सयबुँदे शासकीय सुधारसम्बन्धी कार्यसूचीमध्ये खण्ड ‘ख’ अन्तर्गत उल्लिखित प्रशासनिक सुधार, पुनर्संरचना र मितव्ययिता शीर्षकको बुँदा नं १२ मा उल्लेख भएबमोजिम दलगत ट्रेड युनियनहरू खारेज गर्ने निर्णय गरिएको थियो ।
सोही सरकारी निर्णयलाई स्वागत गर्दै वन परियोजना कर्मचारी संगठनको प्रारम्भिक कार्य समितिले मिति आजैबाट आफ्नो समिति भंग गरेको जनाएको हो ।
समितिका सचिव युवराज कार्की र कार्यवाहक अध्यक्ष प्रदीप अर्यालले हस्ताक्षर गरेको सूचनामा सम्बन्धित सबैलाई जानकारीका लागि अनुरोध गरिएको छ ।
यसअघि राष्ट्रिय परीक्षा बोर्डको कर्मचारी युनियनले आफ्नो विघटनको घोषणा गरिसकेको छ ।
मलंगवा, १७ चैत । मधेश प्रदेशमा माध्यमिक शिक्षा परीक्षा (एसइइ) को परीक्षा केन्द्रबाट मोबाइल फोन बरामद भए फिर्ता नदिइने भएको छ ।
प्रदेशका आठै जिल्लाका प्रमुख जिल्ला अधिकारी र शिक्षा विकास तथा समन्वय इकाइका प्रमुखलाई जनकपुरमा बोलाएर मधेश प्रदेश सरकारले परीक्षा केन्द्रभित्र विद्यार्थीको साथबाट मोवाइल बरामद भए नष्ट गर्न निर्देशन दिएको हो । मधेशमा अघिल्ला वर्षहरुको एसइइमा परीक्षा केन्द्रबाट ठुलो मात्रामा मोवाइल फोन बरामद भएको थियो । बैठकमा आफूहरुलाई बोलाएर परीक्षामा हुन सक्ने अमर्यादित गतिविधि रोक्न मोवाइल फोन र अन्य विद्युतीय सामग्री पूर्णरुपमा निषेध गर्न निर्देशन भएको सर्लाहीका प्रमुख जिल्ला अधिकारी रामुराज कडरियाले जानकारी दिए ।
यो वर्षको एसइइ चैत १९ गतेदेखि सुरु हुँदै छ । एसइइका लागि प्रत्येक परीक्षा केन्द्रमा उत्तरपुस्तिकासहितका सामग्री पुगिसकेको छ ।
प्रश्नपत्रसमेत नजिकको प्रहरी कार्यालयमा धमाधम पु¥याउनेक्रम चलिरहेको छ । यो वर्षको एसइइमा मधेश प्रदेशबाट ८७ हजार ५९१ जना परीक्षार्थी सहभागी हुन लागेका शिक्षा विकास निर्देशनालय जनकपुरले जनाएको छ ।
एसइइ सञ्चालनका लागि केन्द्राध्यक्ष, सहायक केन्द्राध्यक्ष, निरीक्षक, परीक्षा सहायक र कार्यालय सहयोगी नियुक्त भइसकेका छन् । ११ हजार ३७१ परीक्षार्थी सामेल हुने सर्लाहीमा पनि एसइइको तयारी लगभग पुरा भइसकेको शिक्षा विकास तथा समन्वय इकाइ मलङ्गवाका सूचना अधिकारी एवं शाखा अधिकृत सुनिलकुमार कुशवाहाले बताए ।
एसइइ सञ्चालन गर्न सर्लाही जिल्लाभर ३५ वटा परीक्षा केन्द्र कायम गरिएका छन् ।
१९ चैतदेखि सुरु हुन लागेको यस वर्षको एसईई परीक्षाका उत्तरपुस्तिका सम्बन्धित परीक्षा केन्द्रमै परीक्षणको व्यवस्था मिलाइएको छ । राष्ट्रिय परीक्षा बोर्डले एक महिनाभित्र नतिजा सार्वजनिक गर्ने तयारी गरेको छ ।
१८ चैत, काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) को उत्तरपुस्तिका परीक्षण सम्बन्धित परीक्षा केन्द्रबाटै गर्ने भएको छ । एक महिना भित्र नतिजा सार्वजनिक गर्ने योजना अनुसार परीक्षा जहाँ भएको हो, त्यहीँबाट उत्तरपुस्तिका परीक्षण गर्न लागिएको हो ।
शिक्षा विज्ञान तथा प्रविधि मन्त्रीमा सस्मित पोखरेल नियुक्त भएपछि एसईईको नतिजा एक महिना भित्र सार्वजनिक गर्न निर्देशन दिएका थिए । ‘नतिजा एक महिनामा सार्वजनिक गर्न मन्त्रालयको निर्देशन छ । त्यसका लागि परीक्षा केन्द्रमा नै परीक्षण केन्द्र कायम गरी उत्तरपुस्तिका परीक्षण गर्ने निर्णय भएको छ,’ एसईई परीक्षा नियन्त्रक टुकराज अधिकारीले भने ।
जुन परीक्षा केन्द्रमा शिक्षक नभएमा वा असुरक्षित महसुस भएमा शिक्षा विकास तथा समन्वय एकाइले सहजीकरण गरेर अर्को ठाउँबाट परीक्षण गर्ने व्यवस्था मिलाइएको छ । ‘शिक्षक नभएको र असुरक्षित ठाउँको परीक्षण केन्द्र सार्न सकिन्छ,’ परीक्षा नियन्त्रक अधिकारीले भने, ‘अरुको हकमा परीक्षा केन्द्रबाट नै उत्तरपुस्तिका परीक्षण हुन्छ ।’
अघिल्ला वर्षहरूमा गोप्यरुपमा परीक्षण केन्द्र तोक्ने गरिन्थ्यो । साथै एउटा प्रदेशको उत्तरपुस्तिका अर्को प्रदेशमा लगेर परीक्षण गर्ने गरिएको थियो । यसपालि सम्बन्धित परीक्षा केन्द्रबाटै परीक्षण हुन लागेको हो ।
यसअघि एसईईको नतिजा असार दोस्रो सातातिर सार्वजनिक हुने गरेको थियो । परीक्षा बोर्डले क्यालेन्डर बनाएर नतिजा सार्वजनिक गर्ने गरेको थियो । तर ढिलागरी नतिजा सार्वजनिक हुनेगरेको गुनासो आउने गरेको थियो । ढिला नतिजा आउँदा विद्यार्थीमा मनोवैज्ञानिक असर पर्नुका साथै ब्रीज कोर्स जस्ता कक्षा सञ्चालन गरेर विद्यार्थीलाई अनावश्यक तनाव दिने गरेको गुनासो आउने गरेको थियो । मन्त्रालयले एसईई पछिको ब्रीज कोर्सका कार्यक्रम सञ्चालनमा रोक लगाउने निर्णय गरिसकेको छ ।
एसईई परीक्षाको तयारी पूरा
राष्ट्रिय परीक्षा बोर्डका अनुसार चैत १९ गते बिहीबार (भोलि) देखि एसईई परीक्षा सुरु हुँदैछ ।
शैक्षिक क्यालेन्डरअनुसार चैत पहिलो साता परीक्षा हुनुपर्ने हो । तर २१ फागुनको प्रतिनिधिसभा चुनावका कारण १९ चैतमा धकेलिएको हो । बोर्डका अनुसार परीक्षाको सबै तयारी पूरा भएको छ ।
परीक्षा सञ्चालन हुनुअघि शिक्षा मन्त्री पोखरेल सहित प्रदेश र जिल्लाका सम्बन्धित अधिकारीहरुको भर्चुअल बैठक समेत बसेको छ । ‘तयारी सकिएको छ । भोलि परीक्षा हुन्छ । प्रदेश र जिल्लासँग हिजो भर्चुअल बैठक पनि भयो । सबै तयारी पूरा भएको ७७ वटै जिल्लाबाट जानकारी आएको छ,’ परीक्षा नियन्त्रक अधिकारीले भने ।
उनका अनुसार प्रश्नपत्र र उत्तरपुस्तिका केन्द्रमा पुगिसकेको छ । केन्द्राध्यक्षहरु पनि नियुक्त भएर सम्बन्धित केन्द्रमा पुगेका छन् । परीक्षा सञ्चालनका लागि कर्मचारी र सुरक्षाकर्मीको टोली पनि खटिने छ ।
यस वर्षको एसईई परीक्षा सञ्चालन गर्न १ हजार ९६६ केन्द्र कायम गरिएको छ । एउटा केन्द्र जापानमा छ । परीक्षा बिहान ८ बजेदेखि सुरु हुनेछ ।
यस वर्ष ५ लाख १२ हजार ४ सय २१ विद्यार्थी एसईईमा सहभागी हुँदैछन् । बोर्डका अनुसार २ लाख ५७ हजार ६ सय १३ छात्रा, २ लाख ५४ हजार ८ सय १ छात्र र ७ जना अन्य छन् । जापानको एभरेस्ट स्कुलबाट २३ जना विद्यार्थीले एसईई परीक्षा दिँदै छन् ।
एसईईलाई शान्तिपूर्ण र भयरहित वातावरणमा सञ्चालन गर्नका लागि बोर्डले सबैलाई आग्रह पनि गरेको छ ।
लालबन्दी, १७ चैत । “आर्थिक समृद्धि र स्वरोजगारको आधार : कृषि, पर्यटन, उद्योग र व्यापार भन्ने मूल नारासहित आयोजित तेस्रो लालबन्दी महोत्सव सम्पन्न भएको छ । उद्योग वाणिज्य सङ्घ लालबन्दीले चैत ४ गतेदेखि लालबन्दी नगरपालिका–९, बस्तीपुरस्थित भूदेव खाद्य उद्योग परिसरमा महोत्सवको आयोजना गरेको थियो ।
स्थानीय उत्पादन तथा सेवाको बजारीकरण, आन्तरिक तथा बाह्य लगानी प्रवद्र्धन, रोजगारीका अवसरहरुको सिर्जना, उद्यमशीलताको विकास तथा स्थानीय कला–संस्कृति, परम्परा र पहिचानको संरक्षण एवं प्रवद्र्धनमा योगदान पु¥याउने उद्देश्यले महोत्सव आयोजना गरिएको उद्योग वाणिज्य संघले बतायो ।
महोत्सवको सोमबार मधेश प्रदेश सभा सदस्य बेची लुंगेलीको प्रमुख आतिथ्यतामा औपचारिक कार्यक्रमको आयोजना गरी समापन गरिएको हो । सांगीतिक कार्यक्रम भने राति अबेरसम्म चलेको थियो । १५ गते समापन गरिने भनिएपनि महोत्सव एक दिन पछि समापन गरिएको हो ।
महोत्सव समापन समारोहमा महोत्सवलाई सफल बनाउन सहयोग गर्ने व्यक्ति तथा संघसंस्था, मेलास्थलमा आएर स्टल राख्ने उद्योगी, व्यवसायी, किसानलगायतलाई सम्मानसमेत गरिएको आयोजक उद्योग वाणिज्य संघ लालबन्दीका महेशकुमार महतोले जानकारी दिए । यसपालिको महोत्सवलाई सुरक्षाको दृष्टिकोणबाट मजबुत पारिएको थियो ।
लण्डनब्रिजसहितका मनोरञ्जनका साधनले यसपालिको महोत्सवमा रौनक थपेको थियो । मेलाको सहआयोजकको रुपमा औद्योगीक शान्ति नेपाल रहेको थियो ।
महोत्सवमा राष्ट्रिय स्तरका थुप्रै चर्चित कलाकारहरुले प्रस्तुति दिएका थिए ।
हरिवन, १६ चैत । सर्लाहीको हरिवन नगरपालिका र नेपाल नेत्र ज्योति संघ अन्तर्गत सञ्चालित आँखा उपचार केन्द्र सुखेपोखरीको संयुक्त आयोजनामा सञ्चालन भइरहेको नि:शुल्क आँखा जाँच शिविरको दोस्रो दिन आज १६७ जनाले आँखा जँचाएका छन् ।
आजको शिविरमा ११५ जना महिला र ५२ जना पुरुषको आँखा जाँचिएको आयोजकले जनाएको छ । जाँचका क्रममा २५ जनामा मोतियाविन्दु (Cataract) समस्या पत्ता लागेको र १५ जनालाई नि:शुल्क चस्मा वितरण गरिएको आयोजकले जनाएको छ ।
हिजो हरिवन नगर अस्पताल सासापुरमा गरिएको नि:शुल्क आँखा जाँच शिविरमा १४२ जनाले आँखा जँचाएका थिए ।महिला ८७ र पुरूष ५५ जनाको आँखा जाँच गर्दा २७ जनामा माेतियाविन्दु फेला परेको हरिओन नगरपालिकाको स्वास्थ्य शाखा प्रमुख रामबाबु चौधरीले जानकारी दिए । सो दिन ३८ जनालाई नि:शुल्क चस्मा वितरण गरिएको थियो ।
शिविर अन्तर्गत भोलि १७ गते अत्रौली स्वास्थ्य चौकीमा आँखा जाँच गरिने छ । शिबिरमा पत्ता लागेका मोतियाविन्दुका बिरामीहरूलाई चैत्र २० र २१ गते आँखा उपचार केन्द्र सुखेपोखरीस्थित बाल पोषण योजना भवनमा नि:शुल्क शल्यक्रिया गरिने छ।
