हरिवन, २ फागुन | सर्लाहीको हरिवनमा आज शनिबार नेपालका प्रथम शहीद लखन थापाको स्मृति दिवस मनाइएको छ ।
नेपाल मगर संघ सर्लाही जिल्ला कार्य समितिको आयोजनामा थापाको तस्बीरमा मार्ल्यापण र उहाँको जीवनीको चर्चा गर्दै स्मृति दिवस मनाइएको हो । विसं १९३३ फागुन २ गते तत्कालीन राणा शासकले गोरखाको शहीद लखन गाउँपालिका ८ बुङ्कोटको काहुले भङ्गारमा थापा र उहाँका सहकर्मी जैसिं चूमी मगरलाई फाँसी दिएका थिए ।
थापालाई नेपाल सरकारले २०७२ साल असोज ३ गते नेपालको पहिलो शहीद भएको मान्यता दिएको हो । यस्तै शहीद लखन थापाको स्मृति दिवसकै अवसरमा आज हरिवनमा नेपाल मगर संघ सर्लाही जिल्ला कार्य समितिको कार्यालयसमेत उद्घाटन गरिएको छ ।
कार्यालयको मधेश प्रदेश सभा सदस्य बेची लुंगेली, नेपाल मगर संघका पूर्व केन्द्रीय सदस्य लेखराम जर्गा मगर, संघका जिल्ला अध्यक्ष कमल बहादुर क्यापछाकी (कामना) लगायत भएर उद्घाटन गरेका नेपाल मगर संघ सर्लाही जिल्ला सचिव संजय बलम्पाकी मगरले जानकारी दिनुभयाे ।
लालबन्दी, १ फागुन । शुक्रबार ३१ औं जनयुद्ध दिवस मनाईएको छ । दिवसका अवसरमा सर्लाहीमा समेत कार्यक्रम गरिएको छ ।
जिल्लामा क्रियाशिल पुर्ब जनमुक्ति सेना नेपालले हरिवनमा ३१ औं जनयुद्ध दिवस विशेष कार्यक्रम गरि मनाएको हो । हरिवन ११ मा रहेको रोयल म:म सेन्टरको हलमा पुर्ब जनमुक्ति सेना नेपालले कार्यक्रम गरेको पुर्ब जनमुक्ति सेना नेपालका कमान्डर जीत बहादुर थोकरले बताए ।
कार्यक्रममा पुर्ब जनमुक्ति सेना नेपालका योद्धाहरुको उपस्थिति रहेको पुर्ब जनमुक्ति सेना नेपालका जिल्ला अध्यक्ष टंक बहादुर बोहोरा (सितल) ले जानकारी दिए । कार्यक्रमका सहभागीहरुले आसन्न प्रतिनिधिसभा निर्वाचन सफल तुल्याउँदै जिल्लाका चारै क्षेत्रका उम्मेदवारलाई जिताउन मुख्य भुमिका खेल्ने संकल्प गरेका अध्यक्ष बोहोराले बताए ।
त्यसैगरी लालबन्दीमा पनि कार्यक्रम भएको छ । तत्कालीन माओवादीको युवादस्ता वाइसीएलको आयोजनामा लालबन्दी ७ स्थित सहिद ईगलको शालिक रहेको स्थानमा कार्यक्रम गरिएको जिल्ला अध्यक्ष घमराज श्रेष्ठ (राजकुमार) ले जानकारी दिए ।
कार्यक्रममा नेपाली कम्युनिस्ट पार्टीकी नेत्री बेची लुंगेली, प्रतिनिधिसभा सदस्य उम्मेदवार प्रमोद साहसहित नेपाली कम्युनिस्ट पार्टीका नेता कार्यकर्ताको सहभागिता रहेको वाईसीएल जिल्ला अध्यक्ष श्रेष्ठले बताए । उनका अनुसार साँझ दिप प्रज्वलन गर्दै कार्यक्रम गरिएको हो ।
यसैबीच नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल प्रचण्डले इतिहासको सहि सम्मानसँगै र वर्तमान जोडेर मात्रै राष्ट्रको भविष्य सुदृड हुने बताएका छन ।
आगामी निर्वाचनमा रुकुम पूर्वका उम्मेदवारसमेत रहेका प्रचण्डले भूमे–२, खाबाङ बगरमा ३१औँ जनयुद्ध दिवसको अवसरमा आयोजित कार्यक्रमलाई सम्बोधन गर्दै सो कुरा बताएका हुन् ।
कार्यक्रमलाई सम्बोधन गर्दै प्रचण्डले फागुन १ केवल गौरवमय अतीतको स्मरण मात्र नभई वर्तमानको जिम्मेवारी र भविष्यको मार्गदर्शनसमेत भएको उल्लेख गरे। उनले सामन्ती राज्यसत्ताविरुद्ध स्वतन्त्रता, समानता र न्यायका पक्षमा नेपाली जनताले ऐतिहासिक विद्रोहको मशाल यही दिन प्रज्वलित गरेको बताए ।
सम्बोधनको क्रममा उनले जनयुद्ध तथा विभिन्न कालखण्डमा भएका जनआन्दोलनका शहीदहरूप्रति श्रद्धाञ्जली अर्पण गर्दै घाइते, अपांग र बेपत्ता योद्धाहरूप्रति उच्च सम्मान व्यक्त गरे । रुकुम पूर्वलाई क्रान्ति र शान्तिको साक्षी भूमि भन्दै उनले यही ठाउँबाट वंशमा आधारित शासन व्यवस्थाविरुद्ध विद्रोह सुरु भएको स्मरण गरे । महिलाहरूले घुम्टो फालेर स्वतन्त्रताको आवाज उठाएको, आदिवासी जनजाति समुदायले पहिचान र स्वाभिमानका लागि संघर्ष गरेको तथा दलित समुदायले जातीय उत्पीडनविरुद्ध आवाज बुलन्द गरेको इतिहास उनले उल्लेख गरे ।
सर्लाही, २९ माघ । २१ फागुनको निर्वाचन नजिकिँदै गर्दा सर्लाहीको चारवटै निर्वाचन क्षेत्रमा चुनावी सरगर्मी बढेको छ । यतिवेला जिल्लाका सबै क्षेत्रमा उम्मेदवार घरदैलोमा व्यस्त छन् । मतदातासँग भेटघाट गर्ने, समस्या सुन्ने, समाधानको प्रतिबद्धता व्यक्त गर्ने मात्र होइन, उम्मेदवारहरू नयाँ योजना र आश्वासन बाँड्दै मतदाताको मन जित्न घरदैलोमा दौडधुप गरिरहेका छन् । विपक्षी उम्मेदवारका समर्थन र विरोधमा नेता तथा कार्यकर्ता चोक–चौतारादेखि सामाजिक सञ्जालसम्ममा खरो उत्रिएका छन् ।
चार निर्वाचन क्षेत्र कायम सर्लाहीमा १३२ जनाको उम्मेदवारी कायम रहेको मुख्य निर्वाचन अधिकृत पुष्पराज थपलियाले जानकारी दिए । जेन–जी आन्दोलनका कारण दुई वर्ष पहिल्यै हुन लागेको निर्वाचनमा नयाँ पुस्ता र नयाँ दलको चर्चा हुँदै गर्दा यहाँ भने पुरानैको वर्चस्व देखिएको छ । कांग्रेस, एमाले, नेपाली कम्युनिस्ट पार्टी, राष्ट्रिय स्वतन्त्र पार्टी, जनता समाजवादी पार्टी नै प्रतिस्पर्धामा देखिएका छन् । यी पाँच पार्टीले क्षेत्रदेखि वडासम्म निर्वाचन परिचालन कमिटी तयार गरेर प्रचारप्रचार तीव्र बनाएका छन् ।
कांग्रेसले क्षेत्र नम्बर १ मा हरि लुंगेली, २ मा कौशलकिशोर राय, ३ मा पुण्यप्रसाद घिमिरे र ४ मा रामआश्रय साहलाई निर्वाचन परिचालन कमिटी संयोजक बनाएको छ । क्षेत्रीय सभापतिले पालिका कमिटी र पालिकाले वडा निर्वाचन परिचालन कमिटी गठन गरेर काम गरिरहेको कांग्रेस सर्लाहीका कार्यवाहक सभापति डा. सरोज कुमारले बताए ।
एमालेले चारवटै क्षेत्रमा निर्वाचन परिचालन समिति संयोजक तोकेर चुनावी गतिविधि सुरु गरेको जिल्ला अध्यक्ष राजनारायण साहले बताए । सर्लाही १ मा गोविन्द महत, २ मा जयप्रकाश यादव, ३ मा विदुर प्याकुरेल र ४ मा शिवपूजन यादव निर्वाचन परिचालन कमिटीको संयोजक तोकिएका छन् ।
नेपाली कम्युनिस्ट पार्टीले चारवटै क्षेत्रमा चुनाव प्रचारप्रसार अभियानलाई तीव्र जनाएको छ । निर्वाचन गतिविधिलाई प्रभावकारी बनाउन सबै निर्वाचन क्षेत्रमा संयोजक तोकेर जिम्मेवारी प्रदान गरिएको जिल्ला इन्चार्ज अच्युतम काफ्लेले बताए । उनका अनुसार १ नम्बर क्षेत्रमा उद्धव पाठक, २ मा अशोक यादव, ३ मा राजकुमार यादव र ४ मा राजनारायण यादव संयोजक तोकिएका छन् ।
राष्ट्रिय स्वतन्त्र पार्टीले १ मा गोविन्द ढुंगेल, २ मा शम्भु पण्डित, ३ मा रत्नप्रसाद भट्टराई र ४ मा रामविश्वास महतोलाई क्षेत्रीय कमान्डर घोषणा गरेर निर्वाचन परिचालनको जिम्मेवारी सुम्पिएको जिल्ला सभापति सरोज बानियाँले बताए । सर्लाहीमा पुराना दल र उम्मेदवारको वर्चस्व देखिएको छ । मुख्य ठुला पार्टीबाट समेत पुरानै उम्मेदवारको उम्मेदवारी परेको छ । नयाँ दलमा समेत पुरानै अनुहार छन् । केही उम्मेदवारले क्षेत्र र केहीले पार्टी परिवर्तन गरेका छन् ।
सर्लाही १ मा पुरानै उम्मेदवारबिच भिडन्त
सर्लाही १ मा ठुला दलका तर्फबाट पुरानै नेतालाई अघि सारिएको छ । यस क्षेत्रमा १९ वटा दलसहित २९ जनाको उम्मेदवारी परेको छ । लोकतान्त्रिक समाजवादी पार्टीले गत निर्वाचनमा विजयी रामप्रकाश चौधरीलाई यसपटक पनि उम्मेदवार बनाएको छ । चौधरी गत निर्वाचनमा कांग्रेस, एकीकृत समाजवादी र माओवादीको संयुक्त गठबन्धन उम्मेदवारका रूपमा निर्वाचित भएका थिए । यसपटक उनले जनता समाजवादी पार्टीबाट उम्मेदवारी दिएका छन् । एमालेबाट ०७४ को स्थानीय तह निर्वाचनमा ईश्वरपुर नगरपालिकाको मेयरमा निर्वाचित मनोजकुमार देवकोटा उम्मेदवार बनेका छन् । नेपाली कम्युनिस्ट पार्टीले अघिल्लो निर्वाचनमा जसपाबाट उम्मेदवार बनेका प्रमोद साहलाई अघि सारेको छ । कांग्रेसले शम्भुलाल श्रेष्ठ र राष्ट्रिय स्वतन्त्र पार्टीले नीतिमा भण्डारी (कार्की) लाई मैदानमा उतारेका छन् ।
सर्लाही २ मा पुराना उम्मेदवारलाई नयाँको चुनौती
सर्लाही २ मा यसअघिका नियमित प्रतिस्पर्धीसँगै केही नयाँ उम्मेदवारसमेत मैदानमा उत्रिएका छन् । अघिल्लो निर्वाचनमा तत्कालीन माओवादीको चुनाव चिह्न लिएर उठेका महेन्द्र राय यादव निर्वाचित भएका थिए । उनले २३ हजार ५२९ मत प्राप्त गरेका थिए । उनका निकटतम प्रतिद्वन्द्वी लोकतान्त्रिक समाजवादी पार्टीका उम्मेदवार राजेन्द्र महतो २१ हजार ५१८ मतसहित दोस्रो स्थानमा थिए । यादव र महतो दुवै अहिले पनि उम्मेदवार छन् ।
सर्लाही २ मा यसपटक दलका १४ सहित ३१ जनाले उम्मेदवारी दिएका छन् । यस क्षेत्रबाट कांग्रेसले डा. सरोज कुमार, नेपाली कम्युनिस्टले महेन्द्र राय यादव, नेकपा एमालेले नागेश्वर साह, राष्ट्रिय स्वतन्त्र पार्टीले रविन महतो, राष्ट्रिय मुक्ति पार्टी नेपालले राजेन्द्र महतो, गतिशील लोकतान्त्रिक पार्टीले उमेशकुमार सिंह, नेपालका लागि नेपाली पार्टीले कृष्ण यादव, आमजनता पार्टीले चन्द्रभूषण साह, युनाइटेड नेपाल डिमोक्य्राटिक पार्टीले चन्देश्वर साहलाई चुनावी मैदानमा उतारेको छ । जनता समाजवादी पार्टीबाट भरत चौधरी, नेपाल संघीय समाजवादी पार्टीबाट रवि अहमद, राष्ट्रिय प्रजातन्त्र पार्टीबाट राजकिशोर राय यादव, प्रगतिशील लोकतान्त्रिक पार्टीबाट रामनरेश राय, जनमत पार्टीबाट विपिन कापरले उम्मेदवारी दिएका छन् ।
गत प्रतिनिधिसभा निर्वाचनमा समानुपातिक मततर्फ सबैभन्दा धेरै कांग्रेसले १४ हजार ९९३ मत पाएको थियो । १२ हजार ३३७ मतसहित जनमत दोस्रो, ११ हजार ४३ मतसहित लोसपा तेस्रो, १० हजार ८५९ मतसहित तत्कालीन माओवादी चौथो, सात हजार ५३३ मतसहित जसपा पाँचौँ र पाँच हजार ९३४ मतसहित एमाले छैटौँ स्थानमा थिए ।
सर्लाही ३ मा चारपक्षीय भिडन्त
सर्लाही ३ मा केही पुराना र केही नयाँ अनुहार देखिएका छन् । ठुला दलले पुरानै नेतालाई चुनावी प्रतिस्पर्धामा उतारेका छन् । यस क्षेत्रमा ०७९ को निर्वाचनमा विजयी उम्मेदवार हरिप्रसाद उप्रेती यसपटक पनि एमालेबाट उम्मेदवार बनेका छन् । कांग्रेसले विनोद खनाललाई, नेपाली कम्युनिस्ट पार्टीले पूर्वउपप्रधानमन्त्री तथा गृहमन्त्री नारायणकाजी श्रेष्ठलाई उम्मेदवार बनाएको छ । राष्ट्रिय स्वतन्त्र पार्टीबाट नागेन्द्र साह कलवार उम्मेदवार बनेका छन् । एमाले नेता उप्रेती विजयी यात्रालाई दोहोर्याउने दाउमा छन् ।
यस क्षेत्रमा जनता समाजवादी पार्टीले जयप्रकाश यादव, राष्ट्रिय प्रजातन्त्र पार्टीले ढोलराम बारकोटी, नेपाल कम्युनिस्ट पार्टी (माओवादी)ले पवनकुमार महतो, राष्ट्रिय मुक्ति पार्टी नेपालले महेशराज दहाल, नेपाल मजदुर किसान पार्टीले रमा कोइराला, प्रजातान्त्रिक पार्टी नेपालले रामबहादुर महतो कोइरी, मंगोल नेसनल अर्गनाइजेसनले वीरबहादुर रुम्बा, बहुजन एकता पार्टी नेपालले शिवदयाल महरालाई चुनावी मैदानमा उतारेको छ । प्रगतिशील लोकतान्त्रिक पार्टीबाट सविउल शेष, जनमत पार्टीबाट सुनीलप्रसाद गुप्ता र उज्यालो नेपाल पार्टीबाट त्रिभुवनकुमार सिंह चुनावी मैदानमा होमिएका छन् ।
गगन र अमरेशको भिडन्तले सर्लाही ४ चर्चामा
सर्लाही ४ यसपटक चर्चाको केन्द्रमा छ । भावी प्रधानमन्त्रीको उम्मेदवार घोषणा गरिएका कांग्रेस सभापति गगन थापाको उम्मेदवारीले यहाँको चुनावी माहोल भिन्न बनेको हो । यस क्षेत्रलाई देशकै हेभीवेट उम्मेदवारबिचको प्रतिस्पर्धाका रूपमा हेरिएको छ । कांग्रेस गढका रूपमा रहेको यस क्षेत्रमा गुमेको बिरासत फिर्ता गर्ने लक्ष्यसहित सभापति थापा चुनावी मैदानमा छन् । पहिलो संविधानसभा निर्वाचनमा शिवपूजन राय यादव निर्वाचित यस क्षेत्रमा तीन कार्यकालदेखि अमरेशकुमार सिंह सांसद बनेका छन् । ०६४ र ०७० मा कांग्रेसबाट निर्वाचित भएका सिंह ०७९ मा भने स्वतन्त्र उम्मेदवारी दिएर विजयी भए । यसपटक उनी रास्वपा प्रवेश गरेर उम्मेदवार बनेका छन् । पार्टीको संगठनबाहेक यस क्षेत्रमा सिंहको व्यक्तिगत वर्चस्व पनि छ । यस क्षेत्रमा प्रभावशाली नेताको छवि बनाएका संविधानसभा सदस्य शिवपूजन रायले आफ्नो छोरा अमनिशकुमार यादवलाई एमालेबाट उम्मेदवार बनाएका छन् । नेपाली कम्युनिस्ट पार्टीले रजनिश रायलाई टिकट दिएपछि शिवपूजनले पार्टी परित्याग गरी छोरालाई एमालेको टिकट दिलाएका हुन् । शिवपूजन रायकी छोरी मधुमालाकुमारी यादवको स्वतन्त्र उम्मेदवारीसमेत छ । यस क्षेत्रबाट प्रभावशाली भनिएका अधिकांश पार्टीले उम्मेदवार मैदानमा उतार्दा यहाँको चुनावी माहोल निकै रोमाञ्चक बनेको हो । राष्ट्रिय मुक्ति पार्टी नेपालबाट उदयकान्त मिश्र, उज्यालो नेपाल पार्टीबाट पीताम्बरसिंह कुसवाह, राष्ट्रिय प्रजातन्त्र पार्टीबाट प्रदीपकुमार झा, जनमत पार्टीबाट राकेशकुमार मिश्र, प्रगतिशील लोकतान्त्रिक पार्टीबाट रामचरित्र सहनी, आमजनता पार्टीबाट रिंकीकुमारी साहलगायत छन् । नयाँ पत्रिकाबाट
काठमाण्डौ, २९ माघ । स्वदेशमा अपराध गरी विदेश भागेका १० जनालाई नेपाल प्रहरीले अन्तर्राष्ट्रिय प्रहरी सङ्गठन (इन्टरपोल) सँगको समन्वयमा नेपाल फिर्ता ल्याएको छ ।
चालू आर्थिक वर्षमा ११ जनाविरूद्ध ‘रेड नोटिस’ र तीन जनाविरूद्ध ‘डिफ्युजन’ जारी भएकोमा रेड नोटिस जारी भएका ८ र डिफ्युजन जारी भएका २ जनालाई इन्टरपोलको समन्वयमा विभिन्न देशबाट पक्राउ गरी स्वदेश ल्याइएको नेपाल प्रहरीका केन्द्रीय प्रहरी प्रवक्ता प्रहरी नायब महानिरीक्षक अबि नारायण काफ्लेले बताउनुभयो ।
अघिल्लो आर्थिक वर्षमा ३४ जनाविरूद्ध रेड नोटिस र दुई जनाविरूद्ध डिफ्युजन जारी भएकोमा १७ जना रेड नोटिस जारी भएका र तीन जना डिफ्युजन जारी भएका प्रतिवादीलाई पक्राउ गरी नेपाल फिर्ता ल्याइएको थियो ।
इन्टरपोलसँगको समन्वयमा फरार प्रतिवादीहरूलाई पक्राउ गर्न एवम् अन्तर्राष्ट्रियस्तरमा फरार प्रतिवादीहरूलाई पक्राउ गरी कानुनी दायरामा ल्याउन नेपाल प्रहरी सदैव क्रियाशील रहेको बताउँदै उहाँले अपराध गरेर संसारको जुनसुकै कुनामा लुके पनि उनीहरूलाई कानुनी दायरामा ल्याउन नेपाल प्रहरी प्रतिबद्ध रहेको बताउनुभयो ।
देशमा शान्ति सुव्यवस्था कायम गर्न, निर्वाध ढङ्गले आसन्न निर्वाचन सम्पन्न गर्न तथा अपराध अनुसन्धान एवम् नियन्त्रणमा नेपाल प्रहरी अझ सक्रिय भई विभिन्न सुरक्षा रणनीति अवलम्बन गरी कार्यक्षेत्रमा जुटेको प्रवक्ता काफ्लेले बताउनुभयो ।
फरार प्रतिवादीहरूको अन्तर्राष्ट्रियस्तरमा खोजतलासको लागि नेपाल प्रहरीअन्तर्गतको नेशनल सेन्ट्रल ब्युरो (एनसीबी) को अनुरोधमा इन्टरपोल महासचिवालयले नोटिस जारी गर्दै आएको छ ।
लालबन्दी, २८ माघ । लालबन्दीमा कृषक तथा सरोकारवाला निकायबिच प्रशिक्षण तथा अन्तर्रकृया कार्यक्रम सम्पन्न भएको छ । उद्योग वाणिज्य संघ लालबन्दी सर्लाहीले उष्ण प्रदेशिय बागवानि केन्द्र नवलपुरसँगको समन्वयमा कृषक र सरोकारवाला निकायबिच अन्तरकृया कार्यक्रम सम्पन्न गरेको हो ।
लालबन्दी नगरप्रमुख बासुदेव अधिकारीको प्रमुख आतिथ्यमा नगरभित्रका १४० जना कृषकहरु सहभागी गराएर कार्यक्रम गरिएको उद्योग वाणिज्य संघले जनाएको छ । कार्यक्रममा जिल्लाका कृषिसँग सम्बद्ध कार्यालय तथा संघसंस्थाका प्रमुख एवं प्रतिनिधिको सहभागीता रहेको संघका अध्यक्ष महेश कुमार महतोले जानकारी दिनुभयो ।
कार्यक्रममा सहभागी कृषकहरुलाई कृषि सम्बद्ध कार्यालय र संघसंस्थाहरुले आफ्नो कार्यालयले गर्ने काम, गरेका कामहरु, कृषकहरुले कसरी लाभ लिने भन्ने जानकारीहरु प्रस्तुत गरेका थिए । कृषकहरुलाई कृषि ज्ञान केन्द्र मलंगवा, कृषि यान्त्रीक परिक्षण केन्द्र नवलपुरसहित अन्य संघ संस्थाले बिभिन्न खाले कृषकहितका जानकारीहरु गराएका थिए । कम्पोस्ट मल बनाउने तरिका, फाईदा र आवश्यकताका बारेमा दिपक भर्मिङ कम्पोस्ट मल लालबन्दीबाट सुरज थापाले कृषकहरुलाई जानकारी दिएका थिए ।
.कार्यक्रममा सहभागी कृषकहरुले आफुहरुलाई यस्ता बिषयमा धेरै ज्ञान नभएको र उद्योग वाणिज्य संघले यस्तो कार्यक्रम आयोजना गरेर कृषक र कृषि सम्बद्ध संघसंस्थालाई जोडिदिएकोमा खुसि ब्यक्त गरेका थिए । उनिहरुले स्थानिय सरकारले गर्नुपर्ने काम उद्योग वाणिज्य संघले आयोजना गरेकोमा धन्यवाद समेत दिए ।
कार्यक्रममा नगर उपप्रमुख कल्पनामाया पाख्रिनसहित अन्य कर्मचारीहरु सहभागी थिए । कार्यक्रम उद्योग वाणिज्य संघ लालबन्दीकै हलमा सम्पन्न भएको हो ।
माघ २८, २०८२ । बौद्ध भिक्षुको टोली १०८ दिनको शान्ति यात्रा सकेर अमेरिकाको राजधानी वाशिङ्गटन पुगेको छ । ’वाक फर पिस’ अर्थात् ’शान्तिका लागि पदयात्रा’ कार्यक्रम गएको वर्ष अक्टोबर २६ मा टेक्सासको फोर्ट वर्थबाट शुरू भएको थियो ।
भिक्षु पन्नाकरको नेतृत्वमा रहेको १९ जनाको टोलीले ३ हजार ७०० किलोमिटरको यात्रा पूरा गरेको छ । थेरवाद बौद्ध गुम्बाका विश्वभरका १९ जना भिक्षु रहेको टोलीमा आलोका नामको कुकुर पनि थियो ।
यो कुकुरले सन् २०२२ मा भारतमा पदयात्रामा छँदा टोलीलाई पछ्याएको थियो । सन् २०२५ को अन्त्यमा टोलीले टेक्सासबाट यात्रा शुरू गर्ने निर्णय गरेपछि आलोकालाई भारतबाट अमेरिका लगिएको हो ।
यात्राका क्रममा भिक्षुहरूले अमेरिकाका ८ राज्य पार गर्दै शान्ति, ध्यान र करुणाको सन्देश फैलाए । हजारौँ मानिसले उनीहरूलाई स्वागत गरे र सामाजिक सञ्जालमा लाखौँ मानिसले उनीहरूलाई फलो गरेका छन् ।
यात्राका क्रममा भएको एक दुर्घटनाका कारण एक जना भिक्षुको खुट्टा काट्नुपर्ने अवस्था आए पनि टोलीले आफ्नो लक्ष्य पूरा गर्याे । बौद्ध धर्ममा १०८ एक पवित्र सङ्ख्या मानिन्छ । यसैलाई ध्यानमा राखेर यो यात्रा १०८ दिनमा पूरा गर्ने योजना बनाइएको भिक्षुहरूले बताएका छन् ।
लालबन्दी, २७ माघ ।
लालबन्दी नगरपालिका-१ नवलपुरमा आयोजित प्रथम लालबन्दी मेयर गोल्डकप फुटबल प्रतियोगिता अन्तर्गत आज (मंगलबार) फाइनल खेल हुँदैछ ।
नगद ३ लाख सहित प्रथम उपाधिका लागि आयोजक जीवेश्वर युवा क्लब, सर्लाही र वेङ्गखाडी युवा क्लब, महोत्तरी भिड्दै छन् । फाइनल खेल दिउँसो १ बजेबाट सूरु हुने आयोजक समितिका राजु राईले जानकारी दिए । दोस्रो हुने टिमले नगद १ लाख ५० हजार रुपैंयामात्र प्राप्त गर्नेछ ।
गत माघ १६ गतेबाट जारी प्रतियोगितामा फाइनल प्रतिष्पर्धी बाहेक वीरगन्ज युनाइटेड क्लब पर्सा, रतनपुर युनाइटेड यूथ क्लब बारा, नेपाल खेलकुद क्लब रौतहट, धनुषा–११ धनुषा, गोलबजार स्पोर्टस् क्लब सिराहा, न्यू त्रियूगा स्पोर्टस् क्लब सप्तरी, गाइघाट यूवा क्लब उदयपुर, इनरुवा फुटबल क्लब सुनसरी, भरतपुर फूटबल क्लब चितवन र मकवानपुर जिल्ला फुटबल संघ हेटौंडाले सहभागिता जनाएको आयोजक क्लबका अध्यक्ष दीप बहादुर बुढाथोकी (दीपेन्द्र)ले जानकारी थिए ।
गोलबजार स्पोर्टस् क्लब सिराहा, गाइघाट यूवा क्लब उदयपुर र न्यू त्रियूगा स्पोर्टस् क्लब सप्तरीलाई हराउँदै फाइनल प्रतिष्पर्धामा पुगेको आयोजक जीवेश्वर युवा क्लब तथा मकवानपुर फुटबल संघ हेटौंडा, इनरुवा फुटबल क्लब सुनसरी र वीरगन्ज युनाइटेड क्लब पर्सालाई पराजित गर्दै आयोजकसँग आमनेसामने भएको महोत्तरीबीचको खेल अत्यन्त प्रतिष्पर्धात्मक हुने अनुमान गरिएको छ ।
लालबन्दी, २६ माघ ।
सर्लाहीको लालबन्दी नगरपालिका अन्तर्गत २ ओटा माध्यमिक विद्यालयमा लायन्स क्लव अफ लालबन्दी सिटिले विद्यालय झोला वितरण गरेको छ ।
समाज सेवामा सक्रिय क्लवले लालबन्दी १२ मा रहेको नारायण जनता उमावि र वडा नम्बर १६ मा रहेको श्री डिम जनता माविमा झोला वितरण गरेको हो । क्लवले ति २ विद्यालयमा ५०/५० ओटा झोला वितरण गरेको हो । विद्यालय ब्यवस्थापन समितीका पदाधिकारी, वडाका जनप्रतिनिधिहरु, स्थानीय अभिभावक तथा शिक्षकहरुको उपस्थितीमा क्लवले विद्यालयमा झोला वितरण गरेकाे हो ।
कार्यक्रममा क्लवका तर्फबाट अध्यक्ष रेवन्तराज तिमल्सिना, संस्थापक अध्यक्ष दिपेन्द्र अधिकारी, पूर्व अध्यक्ष बिकल जर्गा मगर, सुरज थापासहितका पदाधिकारीहरु सहभागी भएका थिए ।
राजु श्रीवास्तव, रौतहट,
२६ माघ ।
आगामी फाल्गुन २१ गते हुने प्रतिनिधि सभा निर्वाचनलाई लक्षित गर्दै रौतहट क्षेत्र नम्बर ३ बाट जनता समाजवादी पार्टी (जसपा) नेपालका प्रतिनिधि सभा सदस्य पदका उम्मेदवार गोविन्द चौधरी (छाता छाप) ले आज धरहरी, गोनाही र उचिडिह गाउँमा प्रचार–प्रसार तथा मतदाता भेटघाट कार्यक्रम गरेका छन् ।
भेटघाटका क्रममा स्थानीय मतदाताहरूले उम्मेदवार चौधरीलाई २०४८ सालको चुनाव आमछापदेखि नै चिनिरहेको बताउँदै उनको लामो राजनीतिक अनुभव र निरन्तर सक्रियतालाई स्मरण गरेका थिए । मतदातासँगको संवादमा उम्मेदवार चौधरीले कुनै पनि किसिमको लोभ–लालचमा नपर्न आग्रह गर्दै भने, “चुनाव नजिकिँदै जाँदा धेरै जना विभिन्न प्रलोभन लिएर आउन सक्छन्, तर त्यसमा नफस्नुहोस् ।”
उनले यसपटक जनताले वास्तविक परिवर्तन चाहेको उल्लेख गर्दै भने, “परिवर्तनको एक मात्र बलियो विकल्प मेरो उम्मेदवारी हो । मेरो जितका धेरै आधार छन्—मेरो आफ्नै समुदायको पूर्ण साथ र समर्थन, लामो समयदेखि साथमा रहेका राजनीतिक सहयात्रीहरूको सहयोग, र तपाईं मतदाताहरूको विश्वास ।”
मतदाताहरूको साथ र सहयोग रहेमा यसपालि रौतहट–३ मा परिवर्तन निश्चित हुने दाबी गर्दै उम्मेदवार चौधरीले छाता छापमा मतदान गर्न अपिल गरेका छन् ।
सर्लाही । मधेश प्रदेश सरकारले खर्चलाई कटौती गर्न लिखित रूपमा निर्देशन दिएको छ । मधेश प्रदेशको अर्थ मन्त्रालयले चालू आर्थिक वर्ष २०८२/८३ मा हुने सार्वजनिक खर्चमा कटौती गर्न सम्पूर्ण मन्त्रालय, निर्देशनालय तथा मन्त्रालय मातहतका कार्यालय तथा परियोजनालाई अत्यावश्यकबाहेकका खर्च नियन्त्रण गर्न परिपत्र गरेको हो ।
परिपत्रमा गाडी खरिद, फर्निचर खरिद, कार्यालय सजावट एवम् महँगा सामान खरिद, अनावश्यक गोष्ठी, भ्रमण तथा अतिथि सत्कारजस्ता खर्चमा पूर्णरूपमा कडाइ गर्न निर्देशन छ । जथाभाबी बजेटको दुरुपयोग नगर्न तथा बजेटमा सुशासन कायम गर्न तथा सीमित स्रोत साधनलाई प्रभावकारी रूपमा परिचालन गर्न पछिल्लो निर्णय गरिएको पत्रमा उल्लेख छ ।
प्रदेश अर्थ मन्त्रालयका उपसचिव जयकुमार राउतद्वारा हस्ताक्षरित पत्रमा अत्यावश्यक सेवा प्रवाह, विकास निर्माणका चालू आयोजना तथा प्राथमिकता प्राप्त योजनामा कुनै असर नपर्ने गरी खर्च व्यवस्थापन गर्न निर्देशन दिइएको छ ।
आवश्यकताबाहेक गाडीको प्रयोग नगर्न, इन्धन तथा खर्च घटाउन तथा मर्मत–सम्भारमा मितव्ययिता अपनाउन पनि आग्रह गरिएको छ । साथै खर्च कटौतीसम्बन्धी जारी भएको विषयमा खर्चको पालना भएको वा नभएको सम्बन्धमा अनुगमन गरिनेछ ।