काठमाडौं– राप्रपा अध्यक्ष राजेन्द्र लिङ्देनले अहिले जनयुद्धको समय नरहेकाले भ्रममा नपर्न प्रचण्डलाई आग्रह गरेका छन् ।  

राजसंस्था र हिन्दू राज्य पुनस्र्थापनाको माग गर्दै संयुक्त जनआन्दोलन परिचालन समितिले मंगलबार काठमाडौंको सिफलमा आयोजना गरेको प्रदर्शनमा लिङ्देनले हिजोकै जस्तो मान्छेलाई तर्साएर आफ्नो मुनी राख्न सकिन्छ की भन्ने भ्रमबाट मुक्त हुन प्रचण्डलाई आग्रह गरेका हुन् ।

आफूहरूको आन्दोलन प्रचण्ड वा कुनै दलको विरुद्ध नभई देशमा गणतन्त्रमा नाममा भइरहेको लुटतन्त्र अन्त्य गर्नका लागि लडिरहेको उनले बताए ।

उनले आफूहरूको आन्दोलनविरुद्ध आउने जोकोहीलाई जनताले प्रतिकार गर्ने उल्लेख गरे । त्यस्तै अध्यक्ष लिङ्देनले निषेधाज्ञा बिस्तार गर्ने, प्रदर्शनलाई रोक लगाउने काम संविधान विपरीत रहेकाले यस्ता निर्णय फिर्ता लिन माग समेत गरे  ।  

राजावादीको प्रदर्शनलाई मध्यनजर गर्दै प्रशासनले सिफलचौर क्षेत्र, कोटेश्वर आकाशे पुलदेखि दक्षिण बालकुमारी क्षेत्र र बल्खु क्षेत्रमा मात्रै प्रदर्शन गर्न पाइने गरी निषेधित क्षेत्र घोषणा गरिसकेको छ । अन्य क्षेत्रमा निषेधित क्षेत्र घोषणा गरेका कारण राजावादीले मंगलबार सिफलचौरमा प्रदर्शन गरेका हुन् ।

काठमाडौं । राष्ट्रिय प्रजातन्त्र पार्टीले भारतको जम्मु कश्मीरको पहलगाममा मंगलबार आतंकवादी समूहले पर्यटकको समूहमाथि गरेको आक्रमणमा एक नेपालीसहित २६ जनाको मृत्यु भएको र दर्जनौं घाइते भएको घटनाप्रति गहिरो दुःख प्रकट गरेको छ ।

राप्रपाले विज्ञप्ति जारी गर्दै यस्ता अमानवीय, क्रुर र ह्रदयविदारक पहलगाम घटनाको निन्दा र भत्सर्ना गरेको हो ।

त्यस्तै, बंगलादेशमा केही समयअघि चर्चित हिन्दू व्यक्तित्व भावेशचन्द्र रायको अपहरणपछि निर्ममतापूर्वक हत्याको विषय पनि उल्लेख गर्दै पछिल्लो समय हिन्दु समुदायलक्षित आक्रमणहरु चिन्ताको विषय भएको पनि राप्रपाले उल्लेख गरेको छ ।

‘जुनसुकै भुगोल र जुनसुकै बहानामा हुने हिन्दुत्व र मानवता विरुद्धको आतंककारी कार्य स्विकार्य हुन सक्दैन, राप्रपा यस्ता आतंकवादी गतिविधिको सदैव विपक्षमा छ’, विज्ञप्तिमा भनिएको छ, ‘दुःखको यस घडीमा छिमेकी देश भारत, भारतीय जनता र भारत सरकारप्रति सहानुभूति व्यक्त गर्दछौं ।’

आतंकवादी आक्रमणबाट ज्यान गुमाएका रुपन्देहीको बुटवल–११, कालिकानगरका सुदीप न्यौपाने र सबै मृतकहरुप्रति राप्रपाले श्रद्धान्जली पनि व्यक्त गरेको छ ।

काठमाडौं : सभामुख देवराज घिमिरेसँग नेपाल शिक्षक महासंघका पदाधिकारीले शुक्रबार मध्यराति छलफल गरेका छन्। १८ दिनदेखि विद्यालय शिक्षा ऐन र आफ्ना माग सम्बोधन हुनुपर्ने भन्दै आन्दोलनमा होमिएको नेपाल शिक्षक महासंघलाई प्रधानमन्त्री केपी शर्मा ओलीले बोलाएर शिक्षक आन्दोलन र समस्या समाधानका विकल्पबारे छलफल गरेलगत्तै सभामुख घिमिरेसँग पनि छलफल भएको हो।

१८ दिनदेखि जारी आन्दोलनमा चासो देखाउँदै प्रधानमन्त्री ओलीले महासंघका प्रतिनिधिहरूलाई वार्ताका लागि बालुवाटार बोलाएका थिए। प्रधानमन्त्रीको आह्वानपछि महासंघका प्रतिनिधिहरू बालुवाटार पुगेका हुन्।

महासंघका अध्यक्ष लक्ष्मीकिशोर सुवेदीले विद्यालय शिक्षा विधेयक छिटो जारी गर्ने विधि र उपायबारे प्रधामन्त्री र सभामुखसँग छलफल भएको जानकारी दिए। भेटपश्चात उनले भने, ‘करिब २ घण्टा चलेको छलफलमा महासंघको तर्फबाट चालु आन्दोलन, शिक्षक–कर्मचारीका माग, मुद्दा र विद्यालय शिक्षा ऐन जारी गर्ने सम्बन्धमा आफ्ना धारणा प्रष्ट पारियो। प्रधानमन्त्रीज्युले सरकारले सम्बोधन गर्न सक्ने कुराबारे सल्लाह गरेर निर्णय लिने तथा ऐन जारी गर्न तदारुकता दिने कुरा गर्नुभयो।’

सुवेदीले विषय टुंगो नलागेको भन्दै आन्दोलन जारी रहेको जानकारी दिए।  उनले भने,‘हामी एक दुई सानातिना मागहरूको लेनदेन गरी फर्किन आन्दोलनमा आएका होइनौं। विगतका सहमति सम्बोधन हुने अग्रगामी ऐन नै हाम्रो लक्ष्य हो।’ 

छलफलमा महासंघका अध्यक्ष सुवेदी, सहअध्यक्ष नानुमाया पराजुली, महासचिव तुलाबहादुर थापा र उपमहासचिव मदनराज जोशी सहभागी थिए। 

विद्यालय शिक्षा विधेयक छिटो पारित गर्नुपर्ने मागसहित महासंघको आह्वानमा चैत २० गतेदेखि काठमाडौं केन्द्रित आन्दोलन भइरहेको छ। प्रधानमन्त्री ओलीले आन्दोलनमा उठाइएका जायज मागहरूबारे गृहकार्य गर्न भन्दै चैत २५ गते उपप्रधानमन्त्री तथा अर्थमन्त्री विष्णुप्रसाद पौडेल, गृहमन्त्री रमेश लेखक र शिक्षा, विज्ञान तथा प्रविधिमन्त्री विद्या भट्टराईलाई निर्देशन दिएका थिए ।

यसकै लागि सरकारले संघीय संसद्को अधिवेशन वैशाख १२ गते शुक्रबार दिउँसो १ बजे बोलाउने निर्णय गरेको छ । यसको उद्देश्य विद्यालय शिक्षा विधेयक पारित गर्नु हो । मन्त्रिपरिषद्को वैशाख २ गतेको बैठकले यो निर्णय गरेको हो । सरकारका तर्फबाट विधेयक पारित गर्न आवश्यक समन्वय र सहजीकरण गर्ने प्रयास भइरहेको जनाइएको छ ।धनका लागि संवाद जारी रहेको, र अझै संवाद गर्न सरकार संवेदनशील तथा गम्भीर रहेको जनाउँदै, विद्यालय भर्ना अभियान, एसईईको उत्तरपुस्तिका परीक्षण र कक्षा १२ को परीक्षालाई मध्यनजर गर्दै आन्दोलन फिर्ता गरी शिक्षकहरूलाई विद्यालय फर्कन आग्रह गरेको छ ।
शिक्षकहरूले प्रस्तावित विद्यालय शिक्षा विधेयकमा शैक्षिक मूल्य, मान्यता तथा पेसाकर्मीहरूको हक, हित र संरक्षण सुनिश्चित हुनुपर्ने माग राखेका छन् । साथै, नेपालको संविधानअनुसार निःशुल्क र समावेशी शिक्षाको ग्यारेन्टी, सरकारसँग गरिएका विगतका सहमति कार्यान्वयनको सुनिश्चितता, र गुणस्तरीय शिक्षाका लागि पर्याप्त लगानी सुनिश्चित हुनुपर्ने मागसमेत अघि सारिएको छ ।

महासंघले स्थानीय तहमा शिक्षकको पेसागत हक, अधिकार र संरक्षण, संविधानले प्रत्याभूत गरेका ट्रेड युनियन अधिकारहरूको कार्यान्वयन, निजी तथा सामुदायिक विद्यालयका निजी शिक्षकलाई सार्वजनिक विद्यालय सरह सेवासुविधा र शिक्षा ऐन लागू हुनुअघि नियुक्त शिक्षकको पेन्सन साबिकको व्यवस्थाअनुसार कायम हुनुपर्ने माग राखेको छ ।

विद्यालय शिक्षा तीनै तहको सरकारको साझा जिम्मेवारीभित्र राखिनुपर्ने, विद्यालयमा कार्यरत सबै प्रकारका (राहत अनुदान शिक्षक, बाविके शिक्षक, विद्यालय कर्मचारी, साविक उमावि, प्राविधिक धारका शिक्षक, करार शिक्षक, संघीय तथा प्रदेश अनुदान शिक्षक आदि) पेसाकर्मीहरूको पूर्ण संरक्षण गरिनुपर्ने महासंघको धारणा छ ।

महासंघले शिक्षा ऐनमा नेपालका प्रचलित श्रम कानुनले दिएका ट्रेड युनियन अधिकार उपयोग गर्न पाउने व्यवस्था राख्नुपर्ने मागसमेत अघि सारेको छ । आन्दोलनरत शिक्षकहरूले शिक्षा ऐन जारी नभएसम्म विद्यालय नफर्कने अडान लिएका छन् ।

काठमाडौं : राष्ट्रिय प्रजातन्त्र पार्टीले वैशाख ७ गते काठमाडौंको निषेधित क्षेत्रमा प्रदर्शन गर्ने निर्णय गरेको छ। बिहीबार काठमाडौंमा बसेको राप्रपा कार्यसम्पादन समिति बैठकले आन्दोलन र पार्टी संगठनलाई सँगसँगै लैजाने र पूर्वघोषित कार्यक्रम अनुसार वैशाख ७ गते काठमाडौंको निषेधित क्षेत्रमा प्रदर्शन गर्ने निर्णय गरेको अध्यक्ष राजेन्द्र लिङदेनले जानकारी दिए। 

बैठकले बैशाख ९ गते ७७ जिल्लामा विरोध सभा र धर्नाका साथै प्रदर्शन गर्ने निर्णय गरेको छ भने उपत्यकामा सबै वडा तहसम्म सबै नेताहरू पुग्दै संगठनलाई मजबुत र आन्दोलन केन्द्रित गर्ने निर्णय गरिएको अध्यक्ष लिङ्देनले बताए। 

त्यस्तै बैठकले चैत १५ गतेको प्रदर्शनका क्रममा पक्राउ परेका रविन्द्र मिश्र र धवलशमशेर राणालगायतलाई तत्काल रिहाइ गर्न माग गरेको छ। आफ्ना नेताको रिहाइका लागि कानुनी तथा राजनीतिक दुवै लडाइँलाई सशक्तरूपमा लैजाने निर्णय भएको अध्यक्ष लिङ्देनले बताए। उनले पार्टीका सबै आन्दोलनका कार्यक्रमलाई व्यवस्थित गर्न विशेष कमिटी बनाउने निर्णय भएको बताए।

उनले शान्तिपूर्ण रूपमा भेला हुन पाउने अधिकारलाई कुण्ठित गर्ने काम सरकारले गरेकाले त्यसको विरोधमा निषेधित क्षेत्रमा प्रदर्शन गर्ने निर्णय गरिएको धारणा राखे। निषेधित क्षेत्रमा प्रदर्शन गरेर आफूहरू सामूहिक रूपमा थुनामा जान तयार भएको उनले बताए।

केपी ओली नेतृत्वको गठबन्धन सरकार सञ्चालनका लागि गठित दुई दलीय संयन्त्रका सदस्य हुन गगन थापा । शुरुवातदेखि नै सरकारलाई सफल बनाउन भूमिका खेल्दै आएका उनी पछिल्लो समय भने सरकारको काम र प्रधानमन्त्री केपी शर्मा ओलीको कार्यशैलीप्रति असन्तुष्टि जनाइरहेका छन् । सरकारको गति र मति ठिक नभएको उनको तर्क रहँदै आएको छ ।

गभर्नर नियुक्तिमा कांग्रेस र एमालेबीच भागबण्डाको रस्साकस्सी परिरहेका बेला गगनले बिचौलियाहरूको पहुँच प्रधानमन्त्रीको शयन कक्षसम्म हुने दाबी गरिदिए । हिजो काठमाडौंमा आयोजित एक कार्यक्रममा उनले अहिलेको अर्थतन्त्रमा बिचौलियाकै कारण समस्या आएको जिकिर गरे ।

‘म यो प्रधानमन्त्री, त्यो प्रधानमन्त्री भन्दिनँ । बिचौलियाहरूको पहुँच प्रधानमन्त्रीको बेडरुमसम्म हुने भयो, नेतृत्वको बेडरुमसम्म हुने भयो । मलाई अहिलेसम्म थाहा थिएन’, सत्ता साझेदार दलको शक्तिशाली महामन्त्रीले भनेका थिए । 

पहिले राष्ट्र बैंकको गभर्नरबारे छलफल हुँदा कौतुहलता हुने गरे पनि पछिल्लो समय बिचौलियाको मान्छे भनेर खुलारूपमा बहस र छलफल हुने अवस्था आएकोमा गगनले चिन्तासमेत जनाए । सत्ता सहकार्य सहज बनाउन गठित उच्चस्तरीय राजनीतिक संयन्त्रका सदस्यले नै यस्तो टिप्पणी गरेपछि बजारमा सरकार धर्माएको अड्कलबाजी हुन थाल्यो । 

शेखर कोइरालाको निरन्तरको आलोचनाका बाबजुत सरकारको समर्थनमा खम्बा बनेर उभिएका र सरकारलाई सफल बनाउन उत्साहित भएर लागेका गगनको आक्रोशले बालुवाटारमा हल्लियो । प्रधानमन्त्री ओलीले कांग्रेस सभापति देउवालाई बोलाएर  कांग्रेस नेताहरुको असन्तुष्टिबारे धारणा मागे । हिजो अपराह्न बालुवाटारमा भएको एक घण्टा लामो संवादमा शेखर, गगन र विश्वप्रकाशको निरन्तरको असन्तुष्टिले गठबन्धनमा पर्ने असरबारे प्रधानमन्त्रीले देउवाको ध्यानाकर्षण गराएका थिए । 

बालुवाटार वार्तामा प्रम ओलीले महामन्त्रीहरुको अभिव्यक्तिलाई लगाम लगाउन घुमाउरो आग्रहसमेत गरेको बताइएको छ । तर, सरकारको निरन्तरतामा ढुक्क रहन विश्वास दिलाएका देउवाले कांग्रेस लोकतान्त्रिक पार्टी भएकाले अभिव्यक्तिमा रोक लगाउन नसकिने भन्दै बरु संयन्त्र बैठकमा छलफल गर्न सुझाव दिए । 

सोहीअनुसार आज साँझ पाँच बजे कार्यदल र छ बजे संयन्त्रको बैठक बोलाइएको छ । तर, गगनले भने आज पनि सरकारको खरो आलोचना गरेका छन् । दुई ठूला दलको सरकार उद्धेश्य अनुरुप हिंड्न नसकेको उनको ठम्याई छ । कुलमान घिसिङ प्रकरणलगायतलाई लिएर उनले सरकारले गर्नुपर्ने काम नगरेको र नगर्नुपर्ने काम गर्दै हिँडेको बताउने गरेका छन् । 

‘यस पटक गठबन्धन सुशासनका लागि बनाइयो । जुन अपेक्षाले यात्रा प्रारम्भ गरियो, जुन गतिमा हामी हिँड्नु पर्ने हो भएको छैन’, गगनले भने, ‘जुन तत्काल हुनुपर्ने निर्णय हुँदैन, नगरे पनि हुने तत्कालै हुन्छ ।’

सरकारबारे गम्भीर समीक्षा गर्नुपर्ने बेला आएको निष्कर्ष सुनाउँदै उनले प्रधानमन्त्रीका अभिव्यक्तिप्रति पनि असन्तुष्टि जनाए । ‘यो सरकार बनेपछिको अवधिलाई हेर्दा जुन अपेक्षाअनुसार हामी मिलेका थियौं, त्यो पुरा हुन सकेको छैन, त्यसैले हामीले गम्भीर समीक्षा गर्नैपर्छ’, महामन्त्री गगनले भने, ‘प्रधानमन्त्रीले दिनमा दुई पटक, कहिलेकाहिँ तीन चार मेरो सरकार ठिक छ भन्नुपर्ने अवस्था छ ।’

अर्का महामन्त्री विश्वप्रकाश शर्माले पनि सरकारले लय पकड्न नसकेको भन्दै असन्तोष व्यक्त गरेका छन् । सरकारको ९ महिने अवधिको समीक्षा गरेका गर्दै उनले सात बुँदे व्याख्यात्मक टिप्पणीमार्फत् सुधारका लागि सुझावसमेत दिएका छन् ।  

गगनले जस्तै शर्माले पनि सरकारले गर्नुपर्ने काम नगरेको तर गर्न नहुने काममा लागेको बताएका छन् । सामाजिक सञ्जाल विधेयक, कुलमान प्रकरण, शिक्षक आन्दोलन, त्रिविको उपकुलपति प्रकरण आदिलाई उनले गर्न नहुने काम भनेका हुन् । त्यस्तै, राष्ट्र बैंकको गभर्नर नियुक्ति प्रकरण र नेपाल प्रहरीको एआइजी नियुक्तको विषय पनि शर्माले उठेका छन् ।

शिक्षकहरुलाई विश्वास दिलाएर अबिलम्ब निर्णय गर्नुपर्नेमा लापरवाही भैरहेको बताएका उनले राष्ट्र बैंकको गर्भनर नियुक्तमा डरलाग्दो गन्ध आएको दाबी गरे ।

सिरहा/

 सिरहामा शनिबार राति सम्पन्न एमालेको ११ औं जिल्ला अधिवेश सकिएसँगै एकजना निर्वाचित वडा अध्यक्षले असन्तुष्टि पोख्दै एमाले पार्टी परित्याग गरेको घोषणा गरेका छन्।

सिरहाको गोलबजार नगरपालिका वडा नं. ६ का वडाध्यक्ष तथा नगर प्रवक्ता समेत रहेका संजीव लामाले आजकै मितिबाट एमाले पार्टीको साधारण सदस्य समेत नरहने गरी पार्टी परित्याग गरेको घोषणा गरेका हुन्।

पार्टीप्रति असन्तुष्टि पोख्दै वडा अध्यक्ष लामाले आफ्नो फेसबुक स्टाटसमा वडाध्यक्ष तथा अन्य सबै जिम्मेवारीसहित एमाले पार्टीको साधारण सद्स्य समेत नरहने घोषणा गरेका छन्।

वडाध्यक्ष लामाले पार्टी परित्याग गरेको निर्णयको कारण भने खुलाइएको छैन। तर शनिबार सम्पन्न एमालेको ११ औं जिल्ला अधिवेशनमा एमाले नेता तथा मधेश प्रदेश इञ्चार्ज लिलानाथ श्रेष्ठले पार्टीमा हैकमवादी चलाएको र पार्टीको बिधान विपरीत कनिष्ठहरुलाइ जिल्ला सदस्यमा समावेश गरिएको भन्दै असन्तुष्टि जनाएका छन्। उनले भने, ´सिरहामा एमाले पार्टी भित्र नातावाद हावी भएको देखिएकोले आफूले राजीनामा दिएको हुँ।’

उनले आफू कुनै नेताको दासानुदास बनेर बस्न नसक्ने भन्दै राजीनामा दिएको र यो कुनैपनी हालतमा फिर्ता नलिने बताए। लीलानाथ श्रेष्ठ मधेश प्रदेश इञ्चार्ज भए देखिनै नाताबाद कृपाबाद हाबी भएको आरोप लाग्दै आएको छ l

२१ चैत, काठमाडौं । कर्मचारीको जोडबलमा १०३ दिनपछि काठमाडौं महानगरपालिकाका प्रमुख प्रशासकीय अधिकृत सरोज गुरागाईं कार्यालय हाजिर भएका छन् ।

बिहीबार गुरागाईंले कर्मचारी र नगर प्रहरीबीचको तनाव झेल्दै कार्यकक्षमा पुगेर हाजिर गरेका हुन् ।

यसैबीच, मेयर बालेन शाहले गुरागराईंलाई रोक्न खोजेका थिए । यद्यपि मेयर सचिवालयको उक्त प्रयास सफल हुन सकेन ।

मेयर शाहको सचिवालयले गत चैत १५ गते काठमाडौंको तीनकुनेमा भएको दमनलाई विषयान्तर गर्नका लागि सरकारकै ठाडो निर्देशनमा यस्तो कार्य भएको बताएको छ ।

‘अनुसन्धानको दायरामा भएको, महानगरले स्पष्ट रुपमा गल्ती देखाइसकेको व्यक्तिलाई कार्यालय प्रवेश गराउने जुन नाटकमञ्चन गरिएको छ,’ मेयर शाहका प्रमुख स्वकिय सचिव भूपदेव शाहले सँग भने, ‘सरकारले दम्भ देखायो । ठाडो आदेशमा १५ गते जुन राज्यले दमन गरेको छ, त्यसको विषयान्तर गर्नका लागि हो ।’

प्रमुख प्रशासकीय अधिकृत गुरागाईं भ्रष्टाचार मुद्दामा दोषी ठहर भएको खण्डमा बिहीबार विरोधमा उत्रिएका जनप्रतिनिधि र कर्मचारी पनि जेल जान तयार हुनुपर्ने मेयर शाहको सचिवालयले बताएको छ ।

निजगढ/बारा

मोवाइल फोनमा आएको शंकास्पद सन्देशले बाराको निजगढ नगरपालिका–७ का एक परिवार यतिबेला शोकमा डुबेको छ ।

व्यवसायिक कामको क्रममा भारतको पटना जान्छु भनेर शनिवार दिउसो १२.३० बजे घरबाट निस्किएका निजगढ नगरपालिका– ७ नगरपालिका रोडका बस्ने टंकराज उप्रेती (दिपक)ले चलाउने भारतीय सिमको मोबाइलबाट श्रीमती कल्पनाको ह्वाट्सअप म्यासेन्जरमा सोही रात ११.४५ बजे आएको शंकास्पद र दुःखद सन्देशले परिवार शोकमा डुबेको हो ।

उप्रेतीकी श्रीमती कल्पनालाई उद्धृत गर्दै ईलाका प्रहरी कार्यालय निजगढका प्रहरी निरीक्षक सुमित कुश्वाहाले दिएको जानकारी अनुसार म्यासेजमा उप्रेतीलाई आसामको बोरो आदिवासीको ‘बोरो ब्रदर्स एन्ड मर्डर’ नामको समूहले साईनाईड नामक ग्याँस सुँघाएर हत्या गरिएको बताइएको छ ।

हत्याबापत उनीहरुले २० हजार अमेरिकी डलर लिएको पनि म्यासेजमा उल्लेख छ । म्यासेजमा उप्रेतीको शव हाल जयगाउँस्थित टिष्टा नदिको अगाडी भुटानको बोर्डर छेउको एउटा कोठामा राखिएको र ३ दिनपछि शवसहित, ब्याग र कपडा नेपाल पार्सल गरिदिने पनि उल्लेख छ ।

प्रहरी निरीक्षक कुशवाहाले कल्पनालाई राति आएको म्यासेजको पुष्टि भइनसकेको र यसबारेमा थप अनुसन्धान भइरहेको बताएका छन । उनले भारतीय सिमबाट म्यासेज आएकोले सोको बारेमा भारतीय प्रहरीमार्फत अनुसन्धान कार्य गरिने बताए । निरीक्षक कुशवाहाका अनुसार यसअघि शनिबार साँझ श्रीमती कल्पनाले गरेको फोन रिसिभ नभएपछि सोही सिमबाट ‘मलाई फोन नगर केहीबेर पछि म आफै म्यासेज गर्छु’ भनेर उप्रेतीले म्यासेज पठाईएको थियो तर लामो समयसम्म पनि कुनै सन्देश नआएपछि कल्पनाले ह्वाट्सअपमा दोस्रो पटक म्यासेज गर्दा उताबाट अर्कै मान्छेले लेखेको जस्तो लाग्ने गरी ‘उसलाई म्यासेज नगर’ भनेर उत्तर पठाइएको र त्यसपछि हिन्दी भाषामा हत्या गरिएको भन्ने अपुष्ट विवरणसहितको लामो सन्देश आएको पाइएको निरीक्षक कुशवाहाले जानकारी दिए ।

उप्रेतीले पुराना गाडी किनबेच गर्ने व्यवसाय गर्दै आएको पारिवारिक स्रोतबाट खुलेको प्रहरीले जनाएको छ । व्यवसायको क्रममा भारत सिलगुडीका एकजनासंग लिनुपर्ने रकम लिन भनेर उप्रेती शनिवार दिउसो पटनातर्फ गएका थिए । ती व्यवसायीले नै उप्रेतीलाई पटना बोलाएको बताइएको छ ।

यसैबीच जिल्ला प्रहरी कार्यालय बाराका प्रहरी उपरीक्षक सन्तोष लामाले उप्रेती परिवारसंग भेट गरेका छन । उनले भारतीय प्रहरीको सहयोगमा उप्रेतीले प्रयोग गरेको मोबाइल फोनको लोकेशन ट्रेस गर्न नेपाल प्रहरीले आवश्यक सहयोग उपलब्ध गराउने बताए ।

यसैबीच सोमबार बिहान ८.१४ बजे पुन दिपकले प्रयोग गर्ने भारतीय सिमको मोबाइलबाट श्रीमती कल्पनाको मोबाइलमा अर्को शंकास्पद र सन्देहात्मक म्यासेज आएको जनाइएको छ । म्यासेजमा ‘घटना जे भयो सकियो, यसबारेमा थप खोजबिन गरे कसैलाई पनि राम्रो हुदैन’ भनेर धम्काइएको प्रहरीले बताएको छ ।

शनिवार राती ११.४५ बजे आएको शंकास्पद र दुःखद सन्देशले शोकमा डुबेको उप्रेती परिवार पछिल्लो म्यासेजले थप चिन्तामा परेको छ । नेपाल प्रहरीको समन्वयमा उप्रेतीको अवस्था बारेमा अनुसन्धान गरिरहेको भारतीय प्रहरीले उनले प्रयोग गर्ने मोबाइलको लोकेशन पत्ता लगाउने प्रयास गरिरहेको छ । भारतीय प्रहरीले बारा प्रहरीमा दिएको जनकारीअनुसार उप्रेतीले प्रयोग गर्ने मोबाइलको लोकेशन आइतवार बिहान मोतिहारी र राति उत्तरप्रदेशमा देखिएको प्रहरीले जनाएको छ ।

प्रहरी निरीक्षक कुशवाहाले श्रीमती कल्पनालाई आएको म्यासेजको सत्यताबारे पुष्टि भइनसकेको र यसबारेमा भारतीय प्रहरीले थप अनुसन्धान गरिरहेको बताए ।

यता जिल्ला प्रहरी कार्यालय बाराको समन्वयमा उप्रेतीको अवस्था पत्ता लगाउन भनेर भारतको मोतिहारी तर्फ गएका आफन्तहरुले कुनै सूचना दिन नसकेको निजगढ प्रहरीले जनाएको छ । भारतमा सोमबार इद पर्वको बिदा परेकोले प्रहरीमार्फत खोजबिनको लागि मोतिहारीतर्फ गएका आफन्तहरुले थप सूचना प्राप्त गर्न नसकेको इलाका प्रहरी कार्यालय निजगढका प्रहरी निरीक्षक सुमित कुशवाहाले जानकारी दिए ।

दिपकले प्रयोग गर्ने भारतीय सिमको मोबाइलबाट शनिवार राति शंकास्पद र अपुष्ट म्यासेज आएपछि खोजीको लागि २ जना आफन्त आईतबार बिहान भारततर्फ गएका हुन ।

१९ चैत, काठमाडौं । प्रतिनिधिसभा सदस्या दीपक बोहराको निधन भएको छ ।

राष्ट्रिय प्रजातन्त्र पार्टी वरिष्ठ नेता एवं पूर्वमन्त्री बोहराको काठमाडौंको चाबहिलस्थित ओम अस्पतालमा निधन भएको उनका स्वकीय सचिव तारामणि चन्दले जानकारी दिए ।

अस्पताल स्रोतका अनुसार बोहराको अस्पताल पुग्नुभन्दा अगाडि नै मृत्यु भइसकेको थियो । ‘उहाँ आज बिहान ८ः३० मा आइपुग्नुभएको थियो । तर उहाँको अस्पताल ल्याउँदै खेरी मृत्यु भइसकेको थियो,’ स्रोतले भन्यो ।

आकस्मिक कक्षमा गनुपर्ने सीपीआर लगायतका उपचार गर्दा पनि  प्रयास सफल नभएको अस्पतालका एक चिकित्सकले जानकारी दिए ।

उनी रुपन्देही क्षेत्र नम्बर-३ बाट निर्वाचित सांसद हुन् ।

पोस्ट कोभिड समस्याले गर्दा उनी अहिले बोल्न नसक्ने अवस्थामा थिए । उनी कोरोना महामारीको दोस्रो लहर (जेठ २०७७) मा संक्रमित भएका थिए । संक्रमणको चार/पाँच महिनापछि बोहरामा स्वरमा केही परिवर्तन देखिएको थियो । पछि थप उपचारका लागि दिल्ली पुगेका बोहरालाई चिकित्सकहरूले पोष्ट कोभिडका कारणले घाँटीमा समस्या भएको बताएका थिए । समस्या थपिएपछि उनी केही समयपछि अमेरिकाको न्यूयोर्क पुगेका थिए । त्यसयता उनी स्पीच थेरापी गर्दै आएका थिए ।

बोहरालाई घाटीको समस्या थियो । उनी चुनावको बेलामा पनि बोल्न नसक्ने अवस्थामा थिए । नबोलेरै उनी निर्वाचित भएका थिए । संसदमा पनि उनले बोलेनन् । उनले आफ्ना कुरा राप्रपाकै अन्य सांसदमार्फत सुनाउने गरेका थिए ।

काठमाडौं- नेपाल विद्युत प्राधिरकणका कार्यकारी निर्देशक कुलमान घिसिङलाई हिजो बसेको मन्त्रिपरिषद्ले पदबाट हटाउने निर्णय गरेपछि उनको समर्थनमा ठाउँ ठाउँमा प्रदर्शन भइरहेको छ।

सोमबार घिसिङ बर्खास्तीमा परेपछि मंगलबार उनका समर्थकहरुले माइतीघरबाट बानेश्वरसम्म जुलस निकालेका छन्। जुलुसमा सहभागीहरुले उर्जामन्त्री दीपक खड्का र प्रधानमन्त्री केपी शर्मा ओलीको रानीनामा मागेका छन्।