बुधवार बिहानै देखि पारिलो घाम लागेको तराईका जिल्लाहरुमा बिहिवार बिहानैदेखि बाक्लो हुस्सु लागेको छ । हुस्सु लागेपछ चिसो अत्यधिक बढेको छ भने जनजीवन प्रभावित भएको छ ।
हुस्सुका कारण रौतहट सहित तराईवासि बिहानैदेखि आगो बालेर तापीरहेका छन भने बिद्यालय उमेरका बालबालीकाहरुलाई समेत मर्का परेको छ । सवारि साधन चलाउन समेत समस्या भएको छ । चिसोका कारण तराईका बिपन्न परिवारलाई समस्या हुने गरेको छ ।
यस बर्ष पहिलेको जस्तो अत्यधिक चिसो र शितलहर नपरेको जानकारहरु बताउँछन । शितलहर परेको खण्डमा तराईको जनजिवन अन्यधिक कष्टकर हुने गरेको छ । तराईमा बसोवास गर्ने डुम, चमार, लगाएतका बिपन्न दलीत समुदाय चिसोका कारण बढि प्रभावित हुने गरेको छन ।
चिसोबाट बच्न चिकित्सकले समेत सुझाव दिएका छन । तराईको चिसोबाट साना केटाकेटी र बृद्धबृद्धालाई बचाउन चिकित्सको जोड छ ।
बिभिन्न मितिमा बरामद अवैध घरेलु तयारि मदिरा प्रहरिले हिजो बुधवार नस्ट गरेको छ ।
ईलाका प्रहरि कार्यालय गरुडा रौतहटको टोलीले बिभिन्न मितीमा सवारि चेकजाँचको क्रममा फेला पारेको १८० लिटर तयारि अवस्थाका घरेलु मदिरा नष्ट गरेको हो ।
प्रहरिका अनुसार गौर चपुर सडक खण्ड नजिकै ईलाका प्रसासन कार्यालय र गरुडा नगरपालीका गरुडाका प्रतिनिधिहरुको उपस्थितीमा मदिरा नष्ट गरिएको हो ।
चीनका राष्ट्रपति सी चिनफिङले आफ्ना सेना कुनै पनि बेला युद्धका लागि तयार रहेको चेतावनी दिएका छन् । भारतसँग टक्कर परिररहेकै बेला उनले चिनियाँ सेना युद्धका लागि तम्तयार रहेको जानकारी दिएका हुन् ।
राष्ट्रपति सीले आफ्नो सेनालाई सैनिक अभ्यास गर्न निर्देशनसमेत दिएको समाचार एजेन्सी सिन्ह्वाले जनाएको छ । केन्द्रीय सैन्य आयोगका अध्यक्ष समेत रहेका राष्ट्रपति सीले सन् २०२१ सुरु भएपछि पहिलोपटक सेनालाई युद्धका लागि तयार रहन निर्देशन दिएको समाचार एजेन्सी सिन्ह्वाले जनाएको छ ।
यस्तै सीले सेनालाई जसरी पनि युद्ध जित्ने तरिकाले तालिम गर्न पनि निर्देशन छन् । गत जुन १५ मा भारतसँगको सीमाना लद्दाखमा भारतीय सेना र चिनियाँ सेना झडप भएको थियो । त्यस क्रममा भारततर्फ २० सैनिकको मृत्यु भएको थियो भने चीनतर्फको क्षतिबारे अहिलेसम्म आधिकारिक जानकारी दिइएको छैन ।
त्यसयता पनि दुई देशका सैनिकबीच बेलाबेला झगडा भइरहेको छ । शान्ति स्थापनाका लागि धेरैपटक वार्ता भए पनि सहमति हुन सकेको छैन ।
यसबीच सीमामा भारत–चीन दुवैले सैन्य शक्ति बढाई आफूलाई युद्धका लागि तम्तयार बनाएका खबर आइरहेका छन् ।
कपिलवस्तुको कृष्णनगरमा रहेको मुस्लिम बिद्यालय जामिया सिराजुलवलुम अलसल्फिया मदरसा झण्डानगरमा बुधवारबाट अर्धवार्षिक परीक्षा शुरु भएको छ । कोभिड १९ संक्रमणको जोखिम अझै रहेकोले स्वास्थ्य सुरक्षा अपनाएर परिक्षामा करिव ८०० जना विद्यार्थी सहभागी भएका छन ।
परिक्षा बिहान र दिउँसो गरि २ चरणमा सञ्चालन गरिएको र बिद्यार्थी तथा शिक्षकहरुलाई अनिवार्य मास्क तथा सेनिटाईजरको प्रयोग पछि मात्र परिक्षामा सामेल गराईएको मदरसाका प्रवक्ता मौलाना मसहुद खाँ नेपालीले बताए । सामाजिक दुरि कायम गरि बिहान ८ः३० बाट १०ः३० बजेसम्म र दिउँसो १ः३० बाट ३ः३० बजेसम्म परिक्षा सञ्चालन गरिने प्रवक्ता खाँले जनाए ।
मदरसाका अध्यक्ष समिम अहमद नदवीका अनुसार कोभिड १९ का कारण नेपाल सरकारले गरेको लामो लकडाउनको समयमा पनी शिक्षकहरुले गरेको मेहनतका कारण परिक्षा गराउन सम्भव भएको हो । भाईरसको संक्रमण फैलीन नदिनका लागी बन्द रहेको मदरसा मंसिर ६ गत्तेबाट संचालनमा आएको थियो ।
साथै मदरसा बन्द भएपनी निरन्तर रुपमा अनलाईन कक्षा संचालन गरिएका कारण पनी परिक्षाको लागी केहि सहज भएको अध्यक्ष नदवीको भनाई छ ।
साथै बिहानको परिक्षामा कृष्णनगर नगरपालीकाका शिक्षा शाखा प्रमुख बलराम पन्थीले बिद्यालयका कर्मचारि तथा पत्रकार सहितको टोलीका साथ परिक्षा हलमा पुगेर परिक्षा अवलोकन गर्नुभएको छ ।
गृह मन्त्रालयले प्रवेशाज्ञा (भिसा) दुरुपयोग गरी इसाई धर्म प्रचारमा संलग्न बेल्जियमका एक दम्पतीलाई निष्काशन गरेको छ । उनीहरूले ललितपुरस्थित पाटन संयुक्त क्याम्पसमा अध्ययनका लागि भिसा लिएका थिए । मन्त्रालयको पुस १६ को ‘सचिवस्तरीय’ निर्णयले वाल्टर स्भेन र लुसिन इभेलियनलाई पाँच वर्ष नेपाल प्रवेशमा प्रतिबन्ध लगाई निष्काशन गरेको हो ।
अध्यागमन विभागका महानिर्देशक रमेशकुमार केसीले उनीहरु अर्काे साता (पुस २६) मा फर्किन लागेको जानकारी दिए । स्भेन र इभेलियन दम्पतीले हवाई टिकटलगायत आवश्यक कागजपत्र विभागमा पेस गरेका छन् ।
धर्म प्रचार गरेको पुष्टि भएपछि निष्काशन गर्न प्रक्रिया अघि बढाउन लाग्दा उनीहरूले अध्यागमनका कर्मचारीलाई अदालत जाने धम्की दिएका थिए । धर्म प्रचार र परिवर्तन गराउँदै हिँड्नु नेपालको संविधानविपरित भएकाले निष्काशन गर्नुको विकल्प नरहेको भनेपछि उनीहरू विभागले तोकेको जरिवाना तिर्न तयार भएका थिए । त्यसपछि विभागले निष्काशन प्रक्रिया अघि बढाउन उनीहरुको विस्तृत विवरण मन्त्रालयमा पठाएको थियो । मन्त्रालयले विभागको प्रस्ताव सदर गरेको हो । अन्नपुर्ण पोष्टबाट…
पछिल्लो २४ घण्टामा ६ हजार ७०६ स्वाब नमूनाको पीसीआर परीक्षण गर्दा ४०९ जनामा कोरोना भाइरस संक्रमण देखिएको छ। यो सहित नेपालमा कोरोना संक्रमितको संख्या २ लाख ७३ हजार ३१० पुगेको स्वास्थ्य तथा जनसंख्या मन्त्रालयले जनाएको छ।
यस्तै बुधबार कोरोनाबाट थप ६ जनाको मृत्यु भएको छ। यो सहित कोरोनाबाट मृत्यु हुनेको संख्या १८ सय ९९ पुगेको छ। आजै थप ४९५ जना कोरोना जितेर डिस्चार्ज भएका छन्। योसँगै कोरोना जित्नेको संख्या २ लाख ५६ हजार १६१ पुगेको छ। यो निको हुने दर ९७.३ प्रतिशत हो।
देशभर सक्रिय संक्रमितको संख्या ५ हजार १३३ रहेको छ। यस्तै अहिले ३४२ जना क्वारेन्टिन र ५ हजार १ सय ३३ जना आइसोलेसनमा रहेको मन्त्रालयले जनाएको छ।
सुदूरपश्चिम प्रदेशका आर्थिक मामिला तथा योजनामन्त्री झपट बोहराले पदबाट राजीनामा दिएका छन् । उनले बुधबार पत्रकार सम्मेलन गरी पदबाट राजीनामा दिएको घोषणा गरेका हुन् ।
बोहराले केपी शर्मा ओली नेतृत्वको नेकपालाई समर्थन गर्दै मन्त्री पदबाट राजीनामा दिएका हुन् । ओली पक्षले उनलाई केन्द्रीय सदस्यसमेत मनोनित गरिसकेको छ ।
सुदूरपश्चिम प्रदेशमा प्रचण्ड–माधव पक्षको बहुमत छ । सुरुदेखि नै ओली पक्षको समर्थन गर्दैका आएका भौतिक पूर्वाधार विकासमन्त्री पठानसिंह बोहरालाई यसअघि नै मुख्यमन्त्री त्रिलोचन भट्टले पदबाट हटाइसकेका छन् ।
नेपाल र भारतबीच परराष्ट्र मन्त्रीस्तरीय संयुक्त आयोगको छैटौं बैठक माघ पहिलो साता हुने तय भएको छ । उच्च कुटनीतिक स्रोतका अनुसार उक्त बैठक नयाँ दिल्लीमा माघ १ र २ गते हुनेछ ।
त्यसका लागि कामचलाउ सरकारका परराष्ट्र मन्त्री प्रदीपकुमार ज्ञवाली दिल्ली जाने छन् । ‘थप केहि घटना नभए, तोकिएकै मितिमा बैठक हुने लगभग पक्का छ,’ कुटनीतिक स्रोतले भन्यो । पुस ५ गते प्रधानमन्त्री केपी शर्मा ओलीले प्रतिनिधि सभा विघटन गरेर नेपालको आन्तरिक राजनीतिमा उथलपुथल भएपछि परराष्ट्र मन्त्री ज्ञवालीको भारत भ्रमणमा अन्योल देखिएको थियो ।
नेपालको प्रस्ताव अनुसार नयाँ दिल्लीले पनि माघको पहिलो साता परराष्ट्र मन्त्रीस्तरीय संयुक्त आयोगको बैठक गर्न तयार भएको हो । यसअघि मंसिर र त्यसपछि पुसमा उक्त बैठक गर्ने भनिए पनि दुवै पक्षबीच एउटै मितिलाई लिएर सहमति नहुँदा पनि बैठक बस्न नसकेको हो ।
यस पटक संयुक्त आयोगको मुख्य एजेन्डा नेपालले यसवर्ष जारी गरेको नयाँ चुच्चे नक्सा रहेको छ । नेपालले लिपुलेक, लिम्पियाधुरा र कालापानीलाई समेटेर नयाँ नक्सा गरी गरे पनि त्यहाँको भू-भागमा भारतीयहरु नै रहेका छन् । भारतसँग भू-भाग फिर्ता ल्याउने विषय बैठकको मुख्य एजेन्डा हुने एक अधिकारीले बताए । कान्तिपुरबाट…
कारको ठक्करबाट पाटेबाघको मृत्यु भएपछि ठक्कर दिने कारका चालकविरुद्ध कारबाही प्रक्रिया अघि बढाइएको छ । कार चालक सर्लाही बलरा नगरपालिका–३ का ५३ वर्षीय अजय मिश्रविरुद्ध कारबाही प्रक्रिया अघि बढाइएको हो ।
बारा जिल्ला अदालतमा उनीविरुद्ध राष्ट्रिय निकुञ्ज तथा वन्यजन्तु संरक्षण ऐन अन्तर्गत मुद्दा दर्ता गरिएको छ । घटना भएकै दिनबाट उनलाई नियन्त्रणमा राखी अदालतबाट म्याद थप गरी अनुसन्धान सुरु गरिएको निकुञ्जका सहायक संरक्षण अधिकृत एवं सूचना अधिकारी रमेश यादवले जानकारी दिए ।
निकुञ्जमा कार्यरत रेञ्जर दीपक तिवारीलाई अनुसन्धान अधिकृतको जिम्मेवारी दिइएको छ । उनले मिश्रसँग बयान लिने लगायतका कार्य गरिरहेका छन् । निकुञ्जले घटनाबारे अनुसन्धानपछि प्रतिवेदन तयार गरेर मिश्रलाई अदालतमा पेस गर्ने छ ।
गत शनिबार बिहान ७ बजे हेटौंडाबाट सर्लाहीतर्फ जाँदै गरेको बा. १६ च ८११ नम्बरको कारले आधाभार जंगल क्षेत्रमा पोथी पाटेबाघलाई ठक्कर दिएको थियो । सडक पार गर्न उफ्रिएको बाघको टाउकोमा कारले ठक्कर दिएको थियो । टाउकोमा ठक्कर लागेपछि बाघको घटनास्थलमै मृत्यु भएको थियो । घटनालगत्तै कार चालक मिश्र स्वयंले प्रहरीलाई घटनाबारे जानकारी गराएका थिए ।
पर्सा राष्ट्रिय निकुञ्जभित्रै भएर पथलैयादेखि हेटौंडा जाने सडकमार्ग छ । जसले गर्दा वर्षेनी जंगली जनावरहरु गाडीको ठक्करबाट मर्ने गरेका छन् ।
नेपालमा बाघ, गैंडा, जंगली हात्ती, सालक, ब्वाँसो, हाब्रे, अर्ना लगायत २६ जातका स्तनधारी, डाँफे मुनाल लगायत ९ जातका चरा, घर्सने प्रजातिमा अजिङ्गर, घडियाल गोही र सुन गोहरीलाई संरक्षित वन्यजन्तुको सूचीमा राखिएको छ ।
राष्ट्रिय निकुञ्ज तथा वन्यजन्तु संरक्षण ऐन २०२९ मा संरक्षित वन्यजन्तु मार्ने विरुद्ध कारबाहीको व्यवस्था छ । ऐनमा गैरकानुनी तरिकाले गैंडा, बाघ, हात्ती, कस्तुरी मृग, ध्वाँसे चितुवा, हिउँ चितुवा वा गौरी गाई मार्ने, घाइते बनाउने, खरिद–बिक्री गर्न वा हस्तान्तरण गरी लिनदिन प्रतिबन्ध लगाइएको छ ।
गैंडाको खाग वा कस्तुरीको बिना, हिउँ चितुवाको छाला तथा त्यस्तै अन्य संरक्षित वन्यजन्तुको आखेटोपहार राख्ने, खरिद–बिक्री गर्ने वा ओसारपसार गर्न नपाइने उल्लेख छ । त्यस्तो व्यक्तिलाई पाँच लाख रुपैयाँदेखि दश लाख रुपैयाँसम्म जरिबाना वा पाँच वर्षदेखि पन्ध्र वर्षसम्म कैद वा दुवै सजाय हुने प्रावधान छ । अनलाईनखबरबाट
सरकारले संसद् विघटन गरी मध्यावधि घोषणा गरेको विरोधमा सर्वोच्च अदालतमा परेका १२ वटा रिटमाथिको सुनुवाई संवैधानिक इजलासमा निरन्तर हुने भनिए पनि बुधबार भएको सुनुवाइपछि एक हप्ताका लागि स्थगित गरिएको छ।
संवैधानिक इजलासमा रहेका न्यायधीश हरिकृष्ण कार्कीले आफ्नो भूमिकामाथि प्रश्न उठेको भन्दै इजलासमा नबस्न स्वआदेश गरेपछि बुधबारको सुनुवाई स्थगित भएर पुस २९ का लागि अर्को पेशी तोकिएको छ।
प्रधानमन्त्री केपी शर्मा ओली पहिलो पटक प्रधानमन्त्री हुँदा २०७२ मा कार्की महान्यायधिवक्ता नियुक्त भएका थिए। महान्यायधिवक्ता प्रधानमन्त्रीको कानूनी सल्लाहाकारको भूमिकामा रहन्छन्।
अहिले संसद् विघटनविरुद्धको रिटमा प्रधानमन्त्री ओलीलाई पनि विपक्षी बनाइएको छ। कुनबेला ओलीका कानूनी सल्लाहाकार रहेका न्यायधीश कार्कीले यो मुद्दा हेर्न नमिल्ने भन्दै बुधबारकै इजलासमा रिट निवेदकका पक्षबाट बहस गर्ने कानून व्यवसायीले प्रश्न उठाएका थिए।
त्यसपछि न्यायधीश कार्कीले इजलासमा नबस्ने स्वआदेश गरेका हुन्। अब प्रधानन्यायधीश चोलेन्द्र शम्शेर राणाले संवैधानिक इजलासका लागि अर्को न्यायधीश चयन गर्नुपर्ने छ। त्यसो त संवैधानिक इजलासमा वरिष्ठ न्यायधीशहरुको पालो मिचेर अन्य न्यायधीशलाई राखिएको भन्दै न्यायधीश चयनको विषयमा पनि बहस भइरहेको छ।