काठमाडौं/ राष्ट्रिय प्रजातन्त्र पार्टी संसदीय दलका प्रमुख सचेतक ज्ञानबहादुर शाहीले उपप्रधान एवं गृहमन्त्री रवि लामिछानेले राहदानी प्रकरण ढाकछोप गर्न प्रधानमन्त्री पुष्पकमल दाहाल ‘प्रचण्ड’को सहारा लिएको टिप्पणी गरेका छन् । हिजो (शुक्रबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले यस्तो बताएका हुन् ।
‘उहाँले डेट गइसकेको नागरिकता प्रयोग गर्नुभएको थियो । अदालतले भन्दियो । उहाँले पनि त्यो स्वीकार गर्नुभयो । उहाँलाई अहिले पासपोर्टको मुद्दाले अल्झायो । प्रचण्डको साथ छोड्न नसक्नुको कारण नै पासपोर्ट हो । अरु कोही मान्छेलाई मुद्दा लाग्छ, त्यही मुद्दा रवि लामिछानेलाई लाग्दैन । उहाँले पुरानो नागरिकताबाट पासपोर्ट निकाल्नुभएको थियो । त्यो कानुनअन्तर्गत गलत हो । उहाँको नयाँ नागरिकताले लिएको भए त्यो गलत होईन । त्यो मुद्दा महान्यायाधिवक्ताको कार्यालयमा रोकिएको छ,’– उनले भने ।
आफ्नो पासपोर्ट काण्ड जोगाउन लामिछानेले प्रचण्डका कोहीपनि मान्छेलाई नछोएको उनको आरोप छ । उनले पञ्चा सिंहलाई उन्मुक्ति दिइएको भन्दै आपत्ति जनाए । हिजो नाकको डाँडी भाच्छु भन्ने मान्छे आज प्रचण्डको खुट्टामा परेको उनको टिप्पणी छ । सहकारी ठगी प्रकरणमा बन्न लागेको संसदीय समितिमा उपप्रधान एवं गृहमन्त्री लामिछानेको नामै तोकिनुपर्ने उनले बताए । नेता शाहीले छानविन गर्ने निकायको प्रमुख गृहमन्त्री आफैं भएकाले निश्पक्ष छानविन हुन नसक्ने भएर संसदीय समिति आवश्यक रहेको बताए । उनले भने, ‘छानविन कसले गर्छ ? गृह मन्त्रालयले होईन ? उहाँकै नाम जोडिएको विषयमा उहाँ आफैंले छानविन गर्न मिल्छ ? उहाँ गृहमन्त्री नभइदिएको भए उहाँको नाम राख्नु आवश्यक थिएन । छानविन गर्ने निकायको प्रमुख त गृहमन्त्री हुन्छन् नि त । आफूलाई आरोप लागेको कुरा आफैंले छानविन गर्न कहाँ मिल्छ ?’
साथै, एमाले अध्यक्ष एवं पूर्व प्रधानमन्त्री केपी शर्मा ओलीको कारण देश बर्वाद भएको उनको आरोप छ । उनले वर्तमान व्यवस्थामा केपी ओली, शेरबहादुर देउवा, प्रचण्ड सबै खराब देखिएको बताए । उनीहरुले सहकारी ठगी प्रकरणमा छानविन समिति बनाउन खुट्टा कमाएको नेता शाहीको टिप्पणी छ ।
कान्तिपुर मिडिया ग्रुपका अध्यक्ष कैलाश सिरोहिया पक्राउ प्रकरणका रोइलो गर्नुपर्ने आवश्कत्ता नरहेको उनले बताए । उनले सिरोहियालाई समाचार लेखेकै भरमा पक्राउ नगरिएको जिकिर गरे । उनले भने, ‘अदालतले पक्राउ पुर्जी जारी गरेको कुरामा के को रोइलो भनेको ? उहाँ निर्दोष भए त छुटिहाल्नुहुन्छ नि । उहाँले समाचार लेखेको भनेर पक्राउ गरेको हो र ? नागरिकताको केसमा पक्राउ गरेको हो । अब गृहमन्त्रीलाई कैलाश सिरोहियाले लेखेको न्यूज गलत हो भने मुद्दा हाल भन्नुपर्छ । कसैले कसैको बारेमा गलत न्यूज लेख्न हुँदैन ।’
राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङदेनले नेपालमा संघीयता बोझिलो र खतरनाक भएको बताउनुभएको छ ।
शुक्रवारबाट शुरु भएको पार्टीको कार्यसमितिको बैठकमा पार्टीको राजनीतिक प्रतिवेदन प्रश्तुत गर्दै अध्यक्ष लिङदेनले आर्थिक र राष्ट्रिय एकताको दृष्टिकोणले नेपालमा संघीयता बोझिलो र खतरनाक भएको बताउनुभएको हो । उहाले मुलुकले तीन तहको राज्य संरचना र धेरै संख्याको जनप्रतिनिधिहरुलाई तलव भत्ता ख्वाएर पाल्न नसक्ने समेत उल्लेख गर्नुभयो।
उहाले मुलुकको दीर्घकालीन हितका लागि सबै दलहरुका बीच राष्ट्रिय सहमति बनाएर प्रदेशको व्यवस्था खारेज गर्दै मुलुकमा नविन समझदारी कायम हुन आवश्यक रहेको बताउनु भयो ।
उहाले भन्नुभयो, ‘नेपाल जस्तो जनसंख्या र भुगोल भएको हिसावले समेत सानो मुलुकले तीन तहको राज्य संरचना र यति धेरै संख्याको जनप्रतिनिधिहरुलाई तलव भत्ता ख्वाएर पाल्न सक्दैन। आर्थिक र राष्ट्रिय एकताको दृष्टिकोणले समेत नेपालको सन्दर्भमा संघीयता बोझिलो र खतरनाक छ।’
उहाले मुलुकलाई दीर्घकालीन अफ्ठ्याराबाट जोगाउनु सबैको कर्तव्य रहेको भन्दै संघीयता देशको समृद्धिको आधार नभइ आर्थिक हिसावले बोझिलो र विकृतिको पर्याय बन्न पुगेको धारणा राख्नु भयो ।
अध्यक्ष लिङदेनले सत्ता स्वार्थका लागि जोसँग जस्तो पनि सम्बन्ध राख्ने प्रवृत्तिका कारण छिमेक र विश्व समुदायमा नेपालको विश्वसनियता कमजोर बनेको बताउनुभयो।
लिङदेनले भन्नुभयो, ‘मुलुकको दीर्घकालीन हितका लागि सबै दलहरुका बीच राष्ट्रिय सहमति बनाएर प्रदेशको व्यवस्था खारेज गर्दै मुलुकमा नविन समझदारी कायम गरी प्रदेश तहको खारेजी मात्र नभइ प्रतिनिधि सभा तथा स्थानीय तहको समेत जनप्रतिनिधिको संख्यामा व्यापक कटौति गर्नुपर्छ। मुलुकलाई दीर्घकालीन अफ्ठ्याराबाट जोगाउनु हामी सबैको कर्तव्य हो। आज संघीयता देशको समृद्धिको आधार होइन, आर्थिक हिसावले बोझिलो र विकृतिको पर्याय बन्न पुगेको छ। प्रदेश राजनीतिक दलका कार्यकर्ता भर्ती गर्ने ठाउँ बनेको छ।’
उहाले सत्ता पक्ष र प्रमुख दलहरुको क्रियाकलाका कारण बिग्रिने सम्बन्ध र देशले भोग्नुपर्ने क्षति सम्बन्धित दलहरुले मात्र नभइ सिंगो देशले व्यहोर्नुपर्ने भन्दै वैदेशिक सम्बन्ध कसैसँग नजिक र टाढाको नभइ समान हुनुपर्ने बताउनु भयो।
केन्द्रीय कार्यसमितिको बैठकमा पार्टी अध्यक्ष लिङदेनले समसामयिक राजनीतिक परिस्थिति र पार्टीको भावी कार्यदिशा सम्बन्धी राजनीतिक प्रतिवेदन पेश गरेको पार्टीका प्रवक्ता मोहन श्रेष्ठले जानकारी दिनुभयो। उहाले महामन्त्री राजेन्द्र गुरुङले सचिवालय सम्बन्धी, कोषाध्यक्ष नीलकण्ठ काफ्लेले आर्थिक प्रतिवेदनहरु पेश गरेका जानकारी वताउनुभयो।
नेता श्रेष्ठले आज नै विभिन्न सात प्रदेशका प्रदेश अध्यक्षले प्रदेशको कार्यप्रगति विवरणसहितको प्रतिवेदन पेश गरेका पनि जानकारी दिनुभयो।
आजबाटै नै विभिन्न प्रतिवेदनमा छलफल हुने र शनिवार प्रतिवेदन र भुगोकेन्द्रित जिम्मेवारीका बारेमा गरेको प्रगति विवरणबारे बैठकलाई जानकारी गराउने कार्यसूचि रहेको सो पार्टीले जनाएकोछ ।
सबै प्रतिवेदनमा छलफल सकिएपछि जेठ १३ गते बैठकले निर्णय सार्वजनिक गर्ने जनाईएको छ ।