अखिल क्रान्तिकारीमा किचलो थप बढ्दै, अध्यक्षका चारै उम्मेदवारलाई बोलाइयो पेरिसडाँडा

काठमाडौं । शनिबार सम्पन्न भएको नेकपा माओवादी केन्द्रको भातृ संगठन अखिल क्रान्तिकारीको अन्तिम मतपरीणाम हालसम्म पनि सार्वजनिक भएको छैन् ।

मतपत्रमा लगाईएको मसीको विवादले दुई दिनदेखि मतगणना रोकिएको छ । रोकिएको मतगणना सुरु गर्ने विषयमा सहमति जुटाउन सबै उम्मेदवारलाई निर्वाचन समितिले पेरिसडाँडा बोलाएको छ।

गैरभौगोलिक २ प्रदेश विश्वविद्यालय र विशेष प्रदेश अन्तर्गत काठमाडौँको वाल्मीकि विद्यापीठमा भएको मतदानको गणना मसी विवादका कारण आइतबार बिहानदेखि अवरुद्ध छ।

मतपत्रमा रेजा लगाउँदा रातो मसी मात्र प्रयोग हुनुपर्नेमा कालो मसी पनि प्रगोग भएको पाइएपछि मतगणनामा बसेका प्रतिनिधिबीच विवाद भएको हो।

मतगणना अघि बढाउने प्रयास सफल नभएपछि अखिल क्रान्तिकारीको केन्द्रीय निर्वाचन समितिले अध्यक्षका सबै उम्मेदवारलाई आज छलफलका लागि पार्टीको मुख्यालय पेरिसडाँडा बोलाएको हो।

क्रान्तिकारीको अध्यक्षका लागि विजयप्रकाश सापकोटा र हेमन्त राईसहित सुदीन पौडेल र अवदेश यादवले उम्मेदवारी दिएका छन् । उम्मेदवार चार जना भएपनि मूख्यगरि विजयप्रकाश सापकोटा र हेमन्त राईबीच तीव्र प्रतिस्पर्धा देखिएको छ ।

अध्यक्षमा भिडिरहेका सापकोटालाई माओवादी नेतृत्वको समर्थन रहेको बताईएको छ । सापकोटालाई उपमहासचिव शक्ति बस्नेतले उम्मेदवार बनाएका हुन् । उनलाई पूर्व अध्यक्ष पञ्चा सिंह र हिमाल शर्मालगायतले साथ दिएका छन् ।

यता पूर्व मन्त्री सुदन किरातीका स्वकीय सचिव रहेका राईलाई उपमहासचिव जनार्दन शर्माको साथ छ । उनलाई हालै उमेरहद लागू भएर बाहिरिएका केही नेताले साथ दिएका छन् । हेडक्वाटरको समर्थन पाएका सापकोटा र संस्थापनइतर समूहका शर्माले उठाएका उम्मेदवार राईबीचको भिडन्तलाई रोचक रुपमा लिईएको छ ।

अहिलेसम्म प्राप्त नतिजा अनुसार सापकोटा २० मतले अघि छन् । सापकोटाले ४८१ मत पाउँदा राईले ४६१ मत पाएका छन् । अब विश्वविद्यालय तथा उपत्यका प्रदेशको मत गणना हुन बाँकी छ ।

अहिलेसम्म सार्वजनिक भएको मत परीणामअनुसार सापकोटाले कोशीमा ५७, मधेसमा ४०, बागमतीमा ८७, गण्डकीमा ६०, लुम्बिनीमा ८५, कर्णालीमा ८०, सुदूरपश्चिममा ७२ मत प्राप्त गरी अग्रता कायमै राखेका छन् । सापकोटालाई पछ्याएका राईले कोशीमा १२६, मधेसमा ४१, बागमती ४८, गण्डकी ३९, लुम्बिनी ६६, कर्णाली ८२, सुदूरपश्चिम ५९ मत पाएका छन् ।