दलित पुजारीबाट पुर्वमन्त्री पाण्डेद्वारा टिका ग्रहण
चितवन, फागुन १४ – महाशिवरात्रि पर्वको पावन अवसरमा चितवन जिल्लाको भरतपुर महानगरपालिका वडा नम्बर २१ कञ्चन विनायक बस्तीमा दलित पुजारीबाट टिका ग्रहण गरि राप्रपाका वरिष्ठ उपाध्यक्ष पुर्वमन्त्री मा. बिक्रम पाण्डेद्वारा शिवगुरु गोरखनाथ मन्दिर भव्य रूपमा उद्घाटन गरिएको छ।
मन्दिरको उद्घाटन पूर्वमन्त्री तथा राष्ट्रिय प्रजातन्त्र पार्टीका वरिष्ठ उपाध्यक्ष माननीय विक्रम पाण्डेज्यूको प्रमुख आतिथ्यमा सम्पन्न भएको हो। यस अवसरमा मन्दिरका मूल पुजारी दिलबहादुर विश्वकर्माले पूजापाठ गराउँदै धार्मिक विधिपूर्वक मन्दिरको समुद्घाटन गराएका थिए।
विशेष महत्वको रूपमा, उद्घाटन समारोहमा माननीय पाण्डेज्यूले दलित पुजारीको हातबाट टिका ग्रहण गर्दै धार्मिक समभाव र सामाजिक समावेशीताको महत्वपूर्ण सन्देश दिनुभएको छ।
उक्त मन्दिर उद्घाटन लागि राष्ट्रिय प्रजातान्त्रिक उत्पीडित उत्थान संगठन केन्द्रिय संयोजक अमर परियार आर्य र समाजसेवी हाल अस्ट्रेलिया बसाई श्री माधव भट्ट ज्युको सक्रियताले मन्दिर निर्माण र उद्घाटन कार्यलाई सफल बनाउन बताइएको छ।
दुई वर्षको कडा मेहनतपछि यस पुण्य कार्यलाई अहिले सफलता मिलेको दुवै जनाले बताएको छ।
स्थानिय बासिन्दाहरूको व्यापक उपस्थितिमा सम्पन्न उद्घाटन कार्यक्रममा धार्मिक भजन-कीर्तन तथा पूजापाठ गरिएको थियो। यस मन्दिरको निर्माणले स्थानीय तथा श्रद्धालु भक्तजनहरूलाई धार्मिक आस्था प्रकट गर्ने अवसर प्रदान गर्ने विश्वास गरिएको छ।
उक्त मन्दिरको उद्घाटनसँगै धार्मिक पर्यटन प्रवर्द्धनमा समेत टेवा पुग्ने अपेक्षा गरिएको छ। स्थानीयबासीहरूले मन्दिरलाई व्यवस्थित राख्दै धार्मिक गतिविधिहरूलाई अझ प्रवर्द्धन गर्नुपर्ने आवश्यकता रहेको बताएका छन्।
उद्घाटन समारोहमा विभिन्न धार्मिक तथा सामाजिक व्यक्तित्वहरूको उपस्थिति रहेको थियो। मन्दिर व्यवस्थापन समितिले भक्तजनहरूलाई मन्दिरको संरक्षण र प्रवर्द्धनमा सहयोग गर्न आग्रह गरिएको थियो ।