लालबन्दी, २३ फागुन । सर्लाही क्षेत्र नं. १ बाट प्रतिनिधि सभा सदस्यमा राष्ट्रिय स्वतन्त्र पार्टी (रास्वपा) की उम्मेदवार नीतिमा कार्की (भण्डारी) निर्वाचित भएकी छन् ।
भण्डारी ३६ हजार ३१० मतान्तरले प्रतिनिधि सभा सदस्यमा चुनिएकी हुन् । भण्डारी ४४ हजार १८१ मतसहित बिजयी भएको सर्लाही क्षेत्र नं. १ का निर्वाचन अधिकृत टीकाबहादुर थापाले बताए । उनलाई निर्वाचन अधिकृत टीकाबहादुर थापाले प्रतिनिधि सभा सदस्यमा निर्वाचित भएको प्रमाण पत्र प्रदान गरे ।
सर्लाही १ मा एक जना संविधान सभा सदस्य र दुई जना पूर्व प्रतिनिधि सभा सदस्यलाई पराजित गर्दै रास्वपाकी भण्डारीले संसदको यात्रा तय गरेकी हुन् । सर्लाही १ मा दोस्रो भएका संविधान सभा सदस्य एवं नेपाली कांग्रेसका शम्भुलाल श्रेष्ठले सात हजार ८७१, नेकपा एमालेका मनोजकुमार देवकोटाले छ हजार १०१, पूर्व प्रतिनिधि सभा सदस्य नेपाली कम्युनिष्ट पार्टीका प्रमोद साहले पाँच हजार ४९८ र निवर्तमान प्रतिनिधि सभा सदस्य जनता समाजवादी पार्टी नेपालका रामप्रकाश चौधरीले तीन हजार ९९१ मत प्राप्त गरेका छन् ।
सर्लाही १ मा कूल खसेको ७९ हजार २०७ मतमध्ये ७३ हजार ८४२ मत सदर भएको निर्वाचन अधिकृतको कार्यालयले जनाएको छ ।
