सर्लाही । नेपाली कांग्रेसको १५ औँ महाधिवेशनको प्रक्रिया अघि बढ्दै गर्दा सर्लाहीमा चुनावी सरगर्मी बढेको छ । यसैक्रममा सर्लाही क्षेत्र नं. १ बाट पेशागत विज्ञ समूहका तर्फबाट ध्रुवप्रसाद रिजालले केन्द्रीय महाधिवेशन प्रतिनिधि पदमा उम्मेदवारी दिएका छन् ।
नेपाली कांग्रेस मधेश प्रदेश समितिका सदस्य तथा प्रदेश संसदीय बोर्ड सदस्यसमेत रहेका रिजाल लालबन्दी नगरपालिका–५ रञ्जितपुरका स्थायी बासिन्दा हुन् । उद्योग, व्यवस्थापन, सार्वजनिक प्रशासन तथा पार्टी राजनीतिमा लामो समयदेखि सक्रिय रिजालको उम्मेदवारीलाई क्षेत्रीय प्रतिनिधिहरूमाझ चासोका साथ हेरिएको छ ।
रिजालले नगर विकास कोषको अध्यक्षका रूपमा सहरी विकास तथा पूर्वाधार व्यवस्थापनको क्षेत्रमा नेतृत्वदायी भूमिका निर्वाह गरिसकेका छन् । श्रम, रोजगार तथा सामाजिक सुरक्षा मन्त्रालयअन्तर्गतको सामाजिक सुरक्षा कोषको सञ्चालक समिति सदस्यसमेत भइसकेका उनी राज्यका विभिन्न निकाय तथा औद्योगिक संस्थानको व्यवस्थापनमा अनुभव हासिल गरेका व्यक्ति हुन् ।
उनले बुटवल धागो कारखाना र हेटौँडा सिमेन्ट उद्योगजस्ता प्रमुख औद्योगिक संस्थानमा महाप्रबन्धक तथा अध्यक्षको जिम्मेवारीसमेत सम्हालिसकेका छन् । निजी क्षेत्रको आर्थिक नीति निर्माण तथा प्रवद्र्धनमा समेत सक्रिय रिजाल नेपाल उद्योग परिसङ्घ (सीएनआई) को राष्ट्रिय परिषद् सदस्यका रूपमा कार्यरत छन् ।
पार्टीभित्र पेशागत तथा व्यवस्थापकीय अनुभव भएका व्यक्तिको सहभागिता आवश्यक रहेको बताउँदै रिजालले पेशागत विज्ञ समूहबाट उम्मेदवारी दिएका हुन् । उनका अनुसार राज्यका विभिन्न निकाय र औद्योगिक संस्थानमा काम गरेको अनुभवलाई पार्टी संगठन तथा नीतिनिर्माणमा उपयोग गर्ने उद्देश्यले उम्मेदवारी अघि बढाइएको हो ।
“म कसैको भाग खोस्न आएको होइन । कांग्रेस सर्लाही क्षेत्र नं. १ का साथीहरूसँग आफ्नो अनुभव साझा गर्दै संगठनलाई सहयोग गर्न र क्षेत्र तथा केन्द्रीय नेतृत्वमा योगदान गर्न आएको हुँ,” रिजालले भने । उनले मतदानमार्फत आफूलाई केन्द्रीय महाधिवेशन प्रतिनिधिका रूपमा जाने अवसर प्राप्त भए पार्टीलाई थप बलियो बनाउन अनुभव र क्षमताको उपयोग गर्ने बताए ।
सर्लाही क्षेत्र नं. १ मा महाधिवेशन प्रतिनिधिका लागि विभिन्न समूहबाट उम्मेदवारीहरू अघि बढिरहेका बेला पेशागत विज्ञ समूहबाट रिजाल अघि सरेका हुन । औद्योगिक व्यवस्थापन, सार्वजनिक निकायको नेतृत्व तथा निजी क्षेत्रसँगको अनुभवलाई उनले आफ्नो उम्मेदवारीको आधार बनाएका छन् ।
