मुख्यमन्त्री लालबाबु राउतलाई कोरोना संक्रमण हल्ला मात्रै

प्रदेश २ का मुख्यमन्त्री लालबाबु राउत पनि कोरोना संक्रमित बनेको हल्ला चलेको छ । तर हल्ला सही नरहेको दावी गरिएको छ ।

मुख्यमन्त्री राउतको कोरोना रिपोर्ट पोजेटिभ नआएको प्रदेश सरकारका प्रवक्ता समेत रहेका आन्तरिक मामिला तथा कानुुन मन्त्री ज्ञानेन्द्र यादवले दावी गरेका छन् । उनले भने, ‘उहाँ (मुख्यमन्त्री) विरामी पर्नुभएको हो । तर कोरोना रिपोर्ट भने पोजेटिभ आएका छैन ।

राउतका प्रेस संयोजक आतिश मिश्रले पनि कोरोना रिपोर्टबारे अनभिज्ञता जनाए । उनले भने, ‘मुख्यमन्त्री ज्यू निवासमै ३/४ दिनदेखि बस्नुभएको छ । अहिले स्वास्थ्यमा सुधार आएको छ । तर कोरोना संक्रमित भएको कुरा मलाई थाहा भएन ।’

मुख्यमन्त्री राउत केहि दिनदेखि सार्वजनिक कार्यक्रममा देखिएका छैनन्। जसका कारण अनेक टिकाटिप्पणी भइरहेको छ । तर मुख्यमन्त्री राउतले स्वयंम केहि प्रतिक्रिया भने जनाएका छैनन् ।