कांग्रेसको आरोप – कोरोना को आडमा सरकारले राजनीति गर्न खोजेको
काठमाडौं : नेपाली कांग्रेसले कोरोना संक्रमणको आडमा सरकारले राजनीति गर्न खोजेको आरोप लगाएको छ। कांग्रेस सभापति शेरबहादुर देउवाको निवास बूढानीलकण्ठमा बुधबार बिहान बसेको कांग्रेस पदाधिकारी बैठकले जनतामा आतंक फैलाएर स्वार्थ सिद्धि गर्ने काम गरेकोभन्दै सरकारको गतिविधिप्रति विरोध गरेको छ।
बैठकपछि सहमहामन्त्री डा. प्रकाशशरण महतले भने, ‘महामारी नियन्त्रणको लागि हामीले प्रधानमन्त्रीलाई १५ बुँदे सुझाव दिएका थियौं, ती कार्यान्वयन गर्नुको सट्टा सरकार संक्रमणको आडमा राजनीति गर्न खोज्दैछ। अब दुई दिनभित्र किनमेल गर भन्ने किसीमका कुरा गरेर सरकारले जनतामा आतंक सिर्जना गरेको छ।’उनले भने, ‘सरकारले संक्रमणको आडमा जनतालाई आतंक फैलाएर स्वार्थसिद्धि गर्ने काम गरेको छ। यसबारे हाम्रो गम्भीर ध्यानाकर्षण भएको छ।’
कांग्रेसले अस्पतालमा अक्सिजनको सुनिश्चितता, बेडको सुनिश्चितता र दुर्गममा पीसीआर परीक्षण पुर्याउने, कोरोना नियन्त्रणतर्फ ध्यान नदिएएको जनाएको छ। महामारीले दैनिक ज्यालादारीदेखि साना लगानीका उद्यमहरू संकटमा परेकोले जीविकोपार्जनका लागि सरकारले राहतको व्यवस्था गर्नुपर्ने कांग्रेसको माग छ।
सहमहामन्त्री महतले प्रतिनिधि सभा विघटन गर्ने सरकार र राष्ट्रपतिको कदमविरुद्ध राजनीतिक र कानूनी लडाईंलाई निरन्तरता दिने निर्णय गरेको बताए।