सर्लाही | लालबन्दीमा जाडोयामलाई मध्यनजर गर्दै पुनः कपडा बैंक संचालनमा ल्याइएको छ । कोरोना संक्रमणका कारण बन्द भएको कपडा बैंक पुनः संचालनमा ल्याइएको हो ।
सारथी युवा क्लबको व्यवस्थापनमा लालबन्दी नगरपालिका–७, स्थित डुमडुमे मन्दिर अगाडि निःशुल्क कपडा बैंक संचालनमा ल्याइएको छ।
गरिव तथा विपन्नलाई जाडोमा न्यानो कपडा प्रदान गर्ने उद्देश्यले संचालित कपडा बैंक शनिवार र सार्वजनिक बिदाको दिन दिउँसो २ बजेदेखि साँझसम्म खुला हुने सारथि युवा क्लवका अध्यक्ष राजेश आचार्यले जानकारी दिनु भयो ।
सक्ने, मनकारी व्यत्तिहरु र संघ सस्थाले प्रयोग गर्न मिल्ने कपडा दिने, गरिब र विपन्न परिवारले प्रयोग गर्ने उद्देश्यले सो कपडा बैंक खोलिएको युवाहरुले बताए ।
युवाहरुले घरमा प्रयोग गर्न मिल्ने कपडा थन्क्याएर राखेको भए तथा ब्यवसायीहरुसँग भएको प्रयोग गर्न मिल्ने पुराना कपडा बैंकमा ल्याएर दिन पनि आग्रह गरेका छन् ।
