पछिल्लो २४ घण्टामा थप १७१ जनामा कोरोना भाइरस (कोभिड १९) संक्रमण पुष्टि भएको छ ।
देशभरका प्रयोगशालामा ३ हजार ८७८ जनाको परीक्षण गर्दा ५९ जना महिला र ११२ जना पुरुषमा संक्रमण पुष्टि भएको हो ।
यससँगै कुल संक्रमितको संख्या २ लाख ७१ हजार ६०२ पुगेको छ । उनीहरुमध्ये २ लाख ६७ हजार २९२ जना संक्रमणमुक्त भएका छन् भने २०३३ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
हाल देशभर २ हजार २७७ संक्रिय संक्रमित छन् । उनीहरुमध्ये ७७० जनाको होम आइसोलेसनमा छन् भने ६१ जनाको आईसीयू र १४ जनाको भेन्टिलेटरमा उपचार भइरहेको छ ।
कोरोना भाइरस (कोभिड १९) विरुद्धको खोप अभियान अन्तर्गत बिहीबारसम्म देशभर १ लाख ५८ हजारभन्दा बढीले खोप लगाएका छन् ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बिहीबार एक प्रेस विज्ञप्ति जारी गर्दै ७७ जिल्लाका २०१ खोप केन्द्रबाट कुल १ लाख ५८ हजार ४८७ जना लक्षित वर्गले खोप लगाएको जानकारी दिएका हुन् ।
प्रदेश १ मा २१ हजार ७५४, प्रदेश २ मा २१ हजार १८५, बागमती प्रदेशमा ५५ हजार ५०४, गण्डकी प्रदेशमा १७ हजार २६७, लुम्बिनी प्रदेशमा २३ हजार ७९८, कर्णाली प्रदेशमा ८ हजार ७२ र सुदूरपश्चिम प्रदेशमा १० हजार ९०७ जनाले खोप लगाएको मन्त्रालयले जनाएको छ ।
माघ १४ गतेबाट सुरु भएको खोप अभियान शनिबारसम्म चल्ने भन्दै मन्त्रालयले सूचना प्रणालीमा दर्ता नभएका कारण खोप सेवा लिनबाट वञ्चित हुन नदिन नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद्, नेपाल अयुर्वेद मेडिकल काउन्सिल र नेपाल फार्मेसी काउन्सिलको दर्ता प्रमाण पत्र र फोटोसहितको परिचयपत्र लिई आएमा सम्बन्धित खोप केन्द्रले खोप लगाउने व्यवस्था मिलाउन समेत सूचित गरेको छ ।
नेपालमा ६ लाख भारतीय नागरिक रहेको एक तथ्यांकले देखाएको छ । भारतीय विदेश मन्त्रालयले त्यहाँको माथिल्लो सभा राज्य सभामा पेस गरेको विवरणमा सो तथ्यांक उल्लेख छ ।
सो तथ्यांक अनुसार विश्वका २०० सयभन्दा बढी मुलुकहरुमा भारतीय नागरिकहरु गैरआवासीयको हैसियतमा बसिरहेका छन् । पछिल्लो समयमा कोभिड–१९ का कारण भारतले विभिन्न देशहरुबाट आफ्ना नागरिकहरु उद्धार गरिरहेको छ ।
सो तथ्यांक अपडेट गरेर भारतीय विदेश मन्त्रालयले विभिन्न देशमा रहेका आफ्ना नागरिकहरुबारे त्यहाँको संसदलाई जानकारी गराएको हो । विभिन्न देशमा भारतका १ करोड ३० लाख भन्दा बढी व्यक्तिहरुको बसोबास रहेको छ ।
नेपालमा रहेका भारतीय नागरिकको बारेमा भारतले यकिन तथ्यांक राखेपनि भारतमा नेपाली नागरिकहरु कति छन् भन्ने यकिन छैन् । केही वर्ष अगाडि गठन भएको नेपाल–भारत प्रबुद्ध समूहले ७ देखि १० लाख नेपाली भारतमा रहेको दाबी गरेको थियो ।
भारतमा रहेका नेपालीको गणनाका सम्बन्धमा वेला वेलामा बहश भएपनि कुनै प्रक्रिया अगाडि बढेको छैन ।
रौतहटको चन्द्रपुरमा आज नागरिक सम्मान कार्यक्रम गरिएको छ । चन्द्रपुर नगरपालिकाको वडा नम्बर ६ ले बिहिवार आफ्नो वडाका जेष्ठ नागरिक, एकल महिला, अपाङ्ग तथा दुष्टिबिहीनहरुलाई सम्मान गरेको छ ।
जनज्योति बहुमुखी क्याम्पसमा गरिएको सम्मान कार्यक्रममा चन्द्रपुर नगरपालिकाको सामाजिक बिकास फाँटका सभापति सरस्वती खुलालले नगर भित्र बसोबास गर्ने जेष्ठ नागरिक, एकल महिला, अपाङ्ग तथा दुष्टिबिहीनहरुलाई सम्मान गर्ने कार्यक्रम कै निरन्तरतास्वरुप कार्यक्रम गरिएको बताउनुभयो ।
लक्षित बर्गले सम्मान तथा सहयोग सामाग्री पाएपछि खुसि ब्यक्त गर्दै वडा कार्यालयलाई धन्यवाद प्रकट गरेका थिए ।
नेपाल कम्युनिष्ट पार्टीका केन्द्रीय सदस्य एवं सर्लाही ईन्चार्ज डाचाराज वाग्लेको शव पोष्टमार्टका लागि जिल्ला अस्पताल (सदरमुकाम) मलंगवा लगिएको प्रहरी उपरीक्षक सन्तोष सिंह राठौरले जानकारी दिए ।
नेपाल कम्युनिष्ट पार्टीका केन्द्रीय सदस्य एवं सर्लाही ईन्चार्ज वाग्लेको बुधबार राती दुर्घटनामा मृत्यु भएको थियो ।
बरहथबाबाट नयाँरोडतर्फ आउँदै गर्दा मूर्तिया चोकबाट केही सय मिटर उत्तर वन कार्यालय नजिक नयाँरोड–बरहथवा सडकखण्डमा बुधबार राती ९ बजे लडिरहेको अबस्थामा वाग्लेलाई स्थानीयले देखेका थिए । स्थानीयको खबर अनुसार प्रहरी घटनास्थल पुगेको थियो । प्रहरीका अनुसार वाग्ले ज. १० प ३२०६ नम्बरको मोटरसाईकलमा बरहथवाबाट नयाँरोडतर्फ आउँदै थिए ।
बरहथवा स्थित प्राथमिक स्वास्थ्य केन्द्रमा पुर्याउँदा चिकित्सकले वाग्लेको मृत्यु भईसकेको बताएका थिए ।
हरिपुर नगरपालिका–१, हजारबिगाह निवासी वाग्ले बुधबार दिउँसो बरहथवामा पार्टीको जिल्ला कमिटीको पूर्ण बैठकमा सहभागि भई पार्टीले नै बुधबार साँझ आयोजना गरेको मसाल जुलुसको नेतृत्व गर्न बरहथवामा बसेका नेकपा जिल्ला अध्यक्ष रेवती पन्तले बताउनुभयो ।