विष्फोटको घटनाका मृतक परिवारलाई क्षतिपूर्ति र घाइतेको उपचार गर्न निजगढका राजनीतिक दलहरुको माग

निजगढ,बाराको निजगढस्थित एक वर्कशपमा भएको शंकास्पद बस्तु विष्फोटनको घटना छानबिन गरी मृतक परिवारलाई क्षतिपूर्ति र घाइतेको उचित उपचार गर्न स्थानीय ६ वटा राजनीतिक दलहरुले माग गरेका छन ।

निजगढमा क्रियाशील नेपाली कांग्रेश, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राप्रपा र नेकपा एकिकृत समाजवादीले सोमवार संयुक्त विज्ञप्ति निकालेर यस्तो माग गरेका हुन ।

‘शंकास्पद बस्तु विष्फोट भएको देखिएकोले सम्बन्धित निकायबाट उक्त घटनाको छानबिन गरी सत्य तथ्य सार्वजनिक गरियोस,’ विज्ञप्तिमा भनिएको छ, घाइतेहरुको उचित स्वास्थ्य उपचारको साथै मृतक परिवारलाई उचित क्षतिपूर्तिको व्यवस्था गर्न सम्बन्धित निकायसंग जोडदार माग गर्दर्छौ ।’

निजगढ नगरपालिका वडा नम्बर ७ स्थित रोहित वर्कशपमा सोमवार दिउसो शंकास्पद बस्तु विष्फोट हुदा वर्कशप संचालक निजगढ नगरपालिका वडा नम्बर ७ का ४३ वर्षीय रेशम मगरको ज्यान गएको छ । मगरको उपचारको क्रममा वीरगञ्जको बयोधा अस्पतालमा मृत्यु भएको प्रहरीले बताएको छ ।

दिउसो १२ः २० बजे लेथ मेसिनबाट पलामको पाइप जस्तो बस्तु काटने क्रममा विष्फोट भएको र सोही क्रममा वर्कशप संचालक मगर र ५ जना कामदारहरु घाइते भएका थिए ।

घाइतेमा पर्सा जिल्ला वीरगन्ज महानगरपालिका वडा नम्बर ९ बस्ने वर्ष ३४ का फिरोद देवान, सोही स्थान बस्ने वर्ष २० को रितु रजत, भारत विहार गवाई बस्ने वर्ष ३५ को राकेश जयसवाल, भारत विहार रामघडवा घर भएका वर्ष २० का अरविन साह र निजगढ नगरपालिका ५ का ४५ वर्षीय सुर्यबहादुर थापा रहेका छन् । उनीहरुको हात र खुट्टा, पेटसहित शरीरका विभिन्न भागमा चोट लागेको छ । घाइतेमध्ये थापाको अवस्था भने सामान्य छ । थापाको निजगढस्थित सामुदायिक अस्पतालमा र अन्यको वीरगञ्जमा उपचार भइरहेको छ ।

‘वर्कशपका मालिक आफै वेल्डिङ्ग मेसिन लगाएर पाइप काटदै थिए, सामुदायिक अस्पतालमा उपचाररत घाइते थापाले भन्नुभयो, एक्कासी ठूलो आवाज आयो । विष्फोटपछि आफू पनि केहीबेर बेहोस भएको र होस फर्किएपछि कामदारहरु भूइमा लडेको अवस्थामा देखेको उहाँले बताउनुभयो ।’

विष्फोट भएको उक्त वस्तु के हो भन्ने बारेमा अझै खुल्न सकेको छैन । जिल्ला प्रहरी कार्यालय बाराका प्रहरी उपरीक्षक सुरेश काफ्लेले ग्यास बेल्डिङ मेसिनले शंकास्पद बस्तु काटने क्रममा विष्फोटन हुनपुगेको र थप अनुसन्धान कार्य जारी रहेको बताउनुभएको छ ।

निजगढ ९ मा कवडी पसल संचालन गरेर बसेका राज जैसवालले मयुरीमा राखेर वर्कशपमा सो विष्फोटक पदार्थ ज्यालामा काट्न ल्याएको प्रहरीले बताएको छ ।

यसैबीच सुरुमा ग्यास सिलिन्डर विस्फोट भएको भनिएको उक्त वस्तु प्रोजेक्टाइल हुन सक्ने प्रहरीको आशंका छ । निजगढ ९ का कवाडी सञ्चालक जयसवालले प्रोजेक्टाइलजस्तै देखिने उक्त वस्तुमा भएको तामा निकाल्न ग्यारेजमा ल्याएका हुन । प्रोजेक्टाइल काट्ने प्रयास गर्दा विस्फोट भएको थियो । प्रहरीका अनुसार मिसाइलमा प्रयोग हुने प्रोजेक्टाइल नेपालमा भने पाइँदैन । सो वस्तु इन्डियन फिल्ड गन १०५ एमएममा प्रयोग हुनेजस्तै देखिएको प्रहरी स्रोतले बताएको छ ।

यद्यपि, हेर्दा बमजस्तै देखिने उक्त वस्तु प्रोजेक्टाइल नै हो वा अन्य विस्फोटक भन्ने परीक्षणपछि मात्रै बताउन सकिने बाराका प्रहरी प्रमुख प्रहरी उपरीक्षक सुरेश काफ्लेले बताउनुभएको छ । ‘फरेन्सिक ल्याबबाट परीक्षणपछि मात्रै विष्फोट भएको बस्तुको बारेमा यकिन हुने’ उपरीक्षक काफ्लेले जानकारी दिनुभयो । उहाँले कवाडी पसलमा कहाँबाट र कसरी उक्त विष्पोटक पदार्थ आइपुग्यो भन्ने बारेमा अनुसन्धान भइरहेको पनि काफ्लेले जानकारी दिनुभयो ।

विष्फोट लगत्तै वर्कशपबाट भागेका जयसवाल कवाडी पसल बन्द गरेर सपरिवार भागेका थिए । उनलाई प्रहरीले जिल्लाकै कोल्हबी नगरपालिका आसपासको क्षेत्रबाट नियन्त्रणमा लिएको छ । जयसवाल र उनकी श्रीमती सुशीलादेवी भारततर्फ भाग्ने प्रयास गर्दै थिए । निजगढबाट कोल्हबी नगरपालिकामा पुगेर एम्बुलेन्स चढेर भारततर्फ जाँदै गर्दा प्रहरीले उनीहरूलाई नियन्त्रणमा परेका हुन ।