विराटनगर । विराट मेडिकल कलेज टिचिङ हस्पिटलले पूर्वी नेपालमै पहिलोपटक दुई अत्याधुनिक उपचार प्रविधि हेमोपर्फ्युजन (Hemoperfusion) र प्लाज्माफेरेसिस (Plasmapheresis) सेवा सुरु गरेको छ । यी प्रविधिमार्फत बिरामीको रगतमा रहेका हानिकारक पदार्थ, विषाक्त तत्व तथा असामान्य एन्टिबडी हटाएर उपचार गरिन्छ ।
हेमोपर्फ्युजन प्रविधिमा बिरामीको रगतलाई विशेष किसिमको फिल्टरमार्फत प्रशोधन गरी शरीरमा रहेका विष, हानिकारक औषधिका अवशेष तथा विभिन्न रासायनिक पदार्थ हटाइन्छ। यो सेवा विशेषगरी विष सेवन (Poisoning), औषधिको अत्यधिक सेवन (Drug Overdose) तथा गम्भीर संक्रमण (Sepsis) भएका बिरामीका लागि प्रभावकारी मानिन्छ ।
त्यस्तै, प्लाज्माफेरेसिस उपचार प्रक्रियामा रगतको प्लाज्मा भागबाट हानिकारक एन्टिबडी तथा विषाक्त पदार्थ छुट्याएर हटाइन्छ । यो विधि मुख्यतः स्नायु प्रणालीसम्बन्धी रोग, मृगौलासम्बन्धी जटिलता तथा अन्य गम्भीर अवस्थाका बिरामीको उपचारमा प्रयोग गरिन्छ ।
विराट मेडिकल कलेज टिचिङ हस्पिटलका कन्सल्टेन्ट एनेस्थेसियोलोजिस्ट तथा क्रिटिकल केयर फिजिसियन डा. दीपक पौडेल का अनुसार, यी अत्याधुनिक सेवा सुरु भएपछि पूर्वी नेपालका बिरामीहरूले अब यस्ता उपचारका लागि काठमाडौं वा भारत जानुपर्ने बाध्यता कम हुने भएको छ ।
डा. पौडेलले यी सेवाले पूर्वी नेपालमै विश्वस्तरीय उपचार सुविधा उपलब्ध गराउने बताउँदै यसबाट बिरामी तथा परिवारको आर्थिक र शारीरिक बोझसमेत कम हुने अपेक्षा गरिएको जानकारी दिनुभयो ।
विराट मेडिकल कलेजले पछिल्लो समय जटिल तथा गम्भीर अवस्थाका बिरामीलाई लक्षित गर्दै आधुनिक चिकित्सा सेवाको विस्तार गर्दै आएको छ ।
