सर्लाहीमा संसद विघटन विरुद्ध २० वटै पालिकाको वडामा नेपाली कांग्रेसले प्रदर्शन गरेको छ । वर्तमान सरकारको असंवैधानिक, प्रतिगामी कदम विरुद्ध नेपाली कांग्रेसले बिहिवार सर्लाहीका २० वटै पालिकाको २ सय वटा वडामा प्रदर्शन गरेको नेपाली कांग्रेस सर्लाहीले जनाएको छ ।सर्लाहीको लालबन्दी नगरपालिका, चन्द्रनगर गाउँपालिका, मलंगवा, बरहथवा, बागमती नगरपालिका लगायत सर्लाहीका २० वटै पालिकामा संसद विघटन विरुद्ध प्रदर्शन गरिएको नेपाली कांग्रेसका सभापती नागेन्द्र कुमार रायले जानकारी दिए ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेको विरोधमा कांग्रेसले गरेको चरणवद्ध आन्दोलनको घोषणा अन्तर्गत बिहिवार देश व्यापी कार्यक्रम अनुसार सर्लाहीका २० वटै पालिकाको वडामा विरोध प्रर्दशन गरिएको नेपाली कांग्रेस सर्लाहीका सभापती रायले बताए ।
संसद विघटनको कार्यलाई नेपाली काँग्रेसले असंवैधानिक र अलोकतान्त्रिक ठहर गरेको छ । यस अघि कांग्रेसले गएको पुष १३ गते १ सय ६५ निर्वाचन क्षेत्रमा र पुष २५ गते ३ सय ३० प्रदेशसभा निर्वाचन क्षेत्रमा तथा माघ ३ गते ७५३ पालिकाहरुमा विरोध प्रदर्शन गरिसकेको नेपाली कांग्रेसका नेता रामबाबु साहले जनाए ।
नेपाली कांग्रेसले संसद विघटनलाई संविधानमा भएको ब्यवस्था प्रतिकुल र जनभावना विपरीतको कार्य भनेको छ ।
