समयमा पर्याप्त मल नपाउँदा सर्लाहीमा आलु उत्पादनमा कमी

सर्लाही | समयमा पर्याप्त मल नपाउँदा सर्लाहीमा आलु उत्पादनमा कमी आएको छ । उत्तर–पश्चिम भेगमा व्यावसायिक आलु खेती गर्दै आएका किसानले समयमै रासायनिक मल उपलब्ध नहुँदा आलु उत्पादनमा दोब्बरले कमी आएको बताएका छन् ।

विगतका वर्षहरूभन्दा उत्पादनमा कमी हुनु र उचित मूल्य पनि नपाउँदा मारमा परेको किसानहरुको गुनासो छ । प्रतिकिलो २५ देखि ३० रूपैयाँको आलुको बिउ किनेर रोपेको आलु अहिले १५ रूपैयाँमा बिक्री गर्नुपरेको उनीहरुको भनाइ छ ।

छिमेकी मुलुक भारतबाट सस्तो मूल्यका आलु बजारमा भित्रिएकाले स्थानीय उत्पादनले भाउ नपाएको उनिहरुको भनाई छ । सर्लाहीको हजरिया, राजघाट, बरहथवा, मानपुर, शंकरपुरलगायत क्षेत्रमा व्यावसायिक आलु खेती हुने गरेको छ ।

यस क्षेत्रमा लालगुलाव, कुप्रीसिन्दुरे, विविरे केतु र कोमल जातको आलु खेती गरिन्छ । जिल्ला कृषि ज्ञान केन्द्रका अनुसार जिल्लाभर १ हजार ४०० हेक्टरमा आलु खेती हुन्छ । शीत भण्डार नहुँदा भाउ राम्रो नपाएको किसानहरुको भनाइ छ ।

यहाँ उत्पादन भएको आलु मलंगवा, बिरगंज, रौतहटको चन्द्रपुर, बाराको कलैयामा रहेको शीत भण्डारमा भण्डारनका लागि लैजानुपर्ने बाध्यता रहेको छ ।