लालबन्दी, २० जेठ । सर्लाहीको लालबन्दी नगर अस्पतालमा हिंसापीडित नागरिकलाई लक्षित गर्दै ‘अस्पतालमा आधारित एकद्वार संकट व्यवस्थापन केन्द्र (One-Stop Crisis Management Center–OCMC)’ सेवाको औपचारिक शुभारम्भ गरिएको छ ।
आज एक औपचारिक कार्यक्रमका बिच सेवाको सुभारम्भ गरिएको हो । कार्यक्रममा लालबन्दी नगरपालिकाका प्रमुख बासुदेव अधिकारी, उपप्रमुख कल्पनामाया पाख्रीन, नगर अस्पतालका मेडिकल सुपरिटेन्डेन्ट डा. चन्दन चौधरी, चिकित्सकहरू, अस्पताल व्यवस्थापन समितिका पदाधिकारी, इलाका प्रहरी कार्यालय लालबन्दीका प्रमुख बिरेन्द्र सिंह जोहारी, विभिन्न राजनीतिक दलका प्रतिनिधि, समाजसेवी तथा स्वास्थ्य संस्थाका प्रमुखहरूको उपस्थिति रहेको थियो ।
याे सेवाको सुरुवातसँगै घरेलु हिंसा, लैङ्गिक हिंसा तथा अन्य प्रकारका हिंसाबाट प्रभावित सेवाग्राहीहरूले लालबन्दी नगर अस्पतालबाटै निःशुल्क उपचार, मनोसामाजिक परामर्श, कानुनी सहजीकरण तथा आवश्यक अन्य सहयोग प्राप्त गर्न सक्नेछन्।
यसअघि यस्ता सेवा लिन जिल्लाको सदरमुकाम मलङ्गवासम्म पुग्नुपर्ने बाध्यता रहेकामा अब स्थानीय स्तरमै सेवा उपलब्ध हुने भएपछि हिंसापीडित नागरिकलाई सहजता हुने अपेक्षा गरिएको छ।
कार्यक्रममा वक्ताहरूले हिंसापीडित व्यक्तिहरूलाई गुणस्तरीय, सहज र पहुँचयोग्य सेवा प्रदान गर्न केन्द्रले महत्वपूर्ण भूमिका निर्वाह गर्ने विश्वास व्यक्त गरेका थिए। नगरपालिकाले नागरिकमैत्री स्वास्थ्य सेवा विस्तार गर्ने अभियानअन्तर्गत यो सेवा सञ्चालनमा ल्याएको जनाएको छ।
